<p><strong>Durgam cheruvu Lake Cable Bridge Problems: </strong>హైదరాబాద్‌కే తలమానికంగా, పర్యాటక రంగంలో ఒక ఐకానిక్ చిహ్నంగా నిలిచిన దుర్గం చెరువు తీగల వంతెన (Cable Bridge) ప్రస్తుతం నిర్వహణ లేక వెలవెలబోతోంది. గత బీఆర్ఎస్ ప్రభుత్వ హయాంలో ఎంతో ప్రతిష్టాత్మకంగా నిర్మించిన ఈ వంతెన, దేశంలోనే అతిపెద్ద ఎక్స్‌ట్రా డోస్డ్ వంతెనగా గుర్తింపు పొందింది. ప్రారంభంలో పర్యాటకులను మంత్రముగ్ధులను చేసిన ఇక్కడి వైభవం, ఇప్పుడు పాలకుల, అధికారుల నిర్లక్ష్యం కారణంగా మసకబారుతోంది.</p>
<p><strong>వెలవెలబోతున్న విద్యుత్ వెలుగులు </strong></p>
<p>ఈ వంతెన ప్రత్యేకతే దాని అద్భుతమైన కలర్ లైటింగ్. రాత్రి వేళల్లో ఆ వెలుగులు పర్యాటకులకు కనువిందు చేసేవి. కానీ, గత కొంతకాలంగా నిర్వహణను పూర్తిగా గాలికి వదిలేయడంతో లైటింగ్ వ్యవస్థ అస్తవ్యస్తంగా మారింది. వంతెనపై ఉన్న ఎల్‌ఈడీ దీపాలు పూర్తిగా వెలగడం మానేశాయి. రెండు నెలల కిందట వరకూ సగం సగం అయినా వెలిగేవి.తర్వాత అవి కూడా వెలగడం లేదు. పాడైపోయినా రిపేర్ చేసే దిక్కు లేదు. దీంతో రాత్రి సమయంలో ఒకప్పుడు ధగధగలాడిన ఆ ప్రాంతం ఇప్పుడు చీకటి నీడలను కప్పుకుంటోంది. నిర్వహణ లోపం వల్ల ఇక్కడికి వచ్చే పర్యాటకుల సంఖ్య కూడా క్రమంగా తగ్గుతోంది.<br /><img src="https://feeds.abplive.com/onecms/images/uploaded-images/2026/01/02/50ff2166f35f4eb995def8210167bbce1767364615144228_original.jpg" /></p>
<p><strong>గుర్రపు డెక్కతో నిండిన చెరువు </strong></p>
<p>వంతెన పైన పరిస్థితి ఇలా ఉంటే, కింద దుర్గం చెరువు పరిస్థితి మరింత దారుణంగా మారింది. ఒకప్పుడు స్వచ్ఛమైన నీటితో కళకళలాడిన ఈ చెరువు, ఇప్పుడు గుర్రపు డెక్క తో నిండిపోయింది. చెరువు ఉపరితలం మొత్తం పచ్చని నాచు, గుర్రపు డెక్క పరుచుకోవడంతో చెరువులో ఓ వైపు నీరు కనిపించని పరిస్థితి నెలకొంది. దీనివల్ల నీటిలో ఆక్సిజన్ తగ్గి దుర్వాసన రావడంతో పాటు, చెరువు పర్యావరణ వ్యవస్థ దెబ్బతింటోంది. గతంలో ఎప్పటికప్పుడు ఈ గుర్రపు డెక్కను తొలగించే పనులు జరిగేవి, కానీ ఇప్పుడు ఆ దిశగా చర్యలు శూన్యమనే విమర్శలు వినిపిస్తున్నాయి. <br /><img src="https://feeds.abplive.com/onecms/images/uploaded-images/2026/01/02/c5a77d8e642c904d6cf88a7c5b2ac18e1767364597386228_original.jpg" /></p>
<p><strong>నిరాసక్తంగా బోటింగ్ , పర్యాటకం </strong></p>
<p>పర్యాటకులను ఆకర్షించే ప్రధాన అంశమైన బూటింగ్ ఇప్పుడు అత్యంత నిరాసక్తంగా మారింది. పరిసరాల్లో పెరిగిన చెత్తాచెదారం, నిర్వహణ లేని పార్కులు పర్యాటకులకు ఇబ్బందిగా మారుతున్నాయి. గతంలో వీకెండ్ వచ్చిందంటే వేల సంఖ్యలో సందర్శకులతో కిక్కిరిసిపోయే దుర్గం చెరువు, నేడు అధికారుల ఉదాసీనత వల్ల పర్యాటకులు తగ్గిపోతున్నారు. చెరువు కబ్జాలకు గురవుతోంది. ఐదెకరలను హైడ్రా కబ్జాల నుంచి విముక్తి చేసింది. హైదరాబాద్ బ్రాండ్ ఇమేజ్‌ను పెంచే ఇలాంటి పర్యాటక ప్రాంతాలను సంరక్షించాల్సిన బాధ్యత ప్రభుత్వంపై ఉంది. ఇప్పటికైనా అధికారులు స్పందించి, తక్షణమే గుర్రపు డెక్కను తొలగించి, వంతెన లైటింగ్ వ్యవస్థను పునరుద్ధరించాలని నగరవాసులు కోరుతున్నారు.<br /><br /><img src="https://feeds.abplive.com/onecms/images/uploaded-images/2026/01/02/c41ed3c092ea886ac55d0ff94ac311d61767364632804228_original.jpg" /></p>
<p> </p>
<p> </p>
<p><iframe class="vidfyVideo" style="border: 0px;" src="https://telugu.abplive.com/web-stories/business/how-to-convert-cryptocurrency-into-our-rupees-232954" width="631" height="381" scrolling="no"></iframe></p>
3 months ago
9 
