<p><strong>Does Gen Z Use Credit Cards:</strong>కాలం చాలా మారిపోయింది. ఒకప్పుడు మొబైల్ ఫోన్లు కేవలం పెద్దలకే పరిమితం కాగా, ఇప్పుడు చిన్న పిల్లలు కూడా వాటిని వాడుతున్నారు. ఈ మార్పు మొబైల్ ఫోన్లకే పరిమితం కాలేదు. జెన్ జీ (Gen Z) తరం వారు కూడా క్రెడిట్ కార్డులను ఎక్కువగా వాడుతున్నారు. ఒకప్పుడు క్రెడిట్ కార్డుల వాడకం పెద్ద నగరాల్లో ఉండే వారికే పరిమితమయ్యేది. ఇప్పుడు చిన్న నగరాలు, గ్రామాల్లో ఉండే యువత కూడా దీన్ని బాగా యూజ్ చేసుకుంటున్నారు. </p>
<h2>నివేదికలో ఏముంది?</h2>
<p>తాజాగా వచ్చిన క్రెడిట్ కార్డుల వినియోగ నివేదిక ప్రకారం, నేటి యువత క్రెడిట్ కార్డులు, ఇతర EMI ద్వారా ఇచ్చే వస్తువులను ఎక్కువగా ఉపయోగిస్తున్నారు. అంతేకాకుండా, తమ మొదటి క్రెడిట్ కార్డును పొందిన కేవలం మూడు నెలల్లోనే, సుమారు 28 శాతం మంది జెన్‌జీ కస్టమర్ల బకాయిలు ₹25,000 దాటాయి. ఇంకా, 69 శాతం మంది జెన్‌జీ కస్టమర్లు తమ మొదటి క్రెడిట్ కార్డును పొందిన ఒక సంవత్సరంలోపే రెండో క్రెడిట్‌ కార్డును తీసుకుంటున్నారు. జెన్ జెడ్ వారు కేవలం షాపింగ్ చేయడమే కాకుండా, గతంలో కంటే ఎక్కువగా ఈఎంఐలు, ఇతర క్రెడిట్ ఉత్పత్తుల కోసం పరుగులు పెడుతున్నారు. </p>
<h2>తొలిసారిగా, జెన్‌జీ మార్గదర్శకత్వం </h2>
<ul>
<li>నివేదిక ప్రకారం, 2026 మార్చి నాటికి, మొదటిసారి క్రెడిట్ కార్డ్ తీసుకున్న వారిలో 50 శాతం మంది 30 ఏళ్లలోపు వారే ఉన్నారు.</li>
<li>మొదటిసారి క్రెడిట్ కార్డ్ తీసుకున్నవారిలో 46 శాతం మంది గ్రామీణ ప్రాంతాలకు చెందినవారు.</li>
<li>ఇప్పుడు పట్టణ ప్రజలే కాకుండా గ్రామీణ ప్రజలు కూడా క్రెడిట్ కార్డులను వేగంగా వాడుతున్నారనేది స్పష్టమవుతోంది.</li>
</ul>
<h2>క్రెడిట్ కార్డుల వాడకం పెరగుదల</h2>
<p>మార్చి 2026 నాటికి క్రెడిట్ కార్డులు కలిగిన వారి సంఖ్య 52 మిలియన్లకు చేరుకుంది. అదే సమయంలో, వాడుకలో ఉన్న యాక్టివ్ క్రెడిట్ కార్డుల సంఖ్య దాదాపు ఐదు రెట్లు పెరిగి 107 మిలియన్లకు చేరింది.</p>
<p>అందుకే బ్యాంకులు కూడా క్రెడిట్ కార్డులు ఎక్కువగా పంపణీ చేస్తున్నాయి. అంతే కాకుండా ఇప్పుడు చెల్లించి తర్వాత పే చేయండి అనే ఆఫర్స్‌ ప్రకటిస్తున్నాయి. ఇలాంటి ఆఫర్స్ ఆకర్షితులయ్యే ముందు కొన్ని విషయాలను గుర్తు పెట్టుకోవాలి. క్రెడిట్ కార్డు, BNPL(బై నౌ పే లేట్)లో పద్ధతులు, ఖర్చులు ఉపయోగాలు వేర్వేరుగా ఉంటాయి. అందువల్ల, వాటిని ఉపయోగించే ముందు పూర్తిగా వాటిని అర్థం చేసుకోవడం ముఖ్యం.</p>
<h2>BNPL అంటే ఏమిటి?</h2>
<p>BNPL అంటే "ఇప్పుడే కొనండి, తర్వాత చెల్లించండి." దీని ద్వారా మీరు వస్తువులు లేదా సేవలను వెంటనే కొనుగోలు చేసి, వాటికి తర్వాత ఒకేసారి లేదా సులభ వాయిదాలలో (EMIలు) చెల్లించవచ్చు. అంగీకరించిన కాలపరిమితిలోపు చెల్లింపులు చేస్తే, చాలా BNPL కంపెనీలు వడ్డీని వసూలు చేయవు. అయితే, చెల్లింపులు సకాలంలో చేయకపోతే, ఆలస్య రుసుములు, వడ్డీ రూపంలో భారీగానే వడ్డిస్తారు. </p>
<p>క్రెడిట్ కార్డ్ అనేది బ్యాంకు అందించే ఒక రుణ సదుపాయం. ఇది ఒక నిర్దిష్ట పరిమితి వరకు ఖర్చు చేయడానికి, బిల్లింగ్ సైకిల్ చివరిలో చెల్లించడానికి మిమ్మల్ని అనుమతిస్తుంది. మీరు పూర్తి బ్యాలెన్స్‌ను సకాలంలో చెల్లిస్తే, సాధారణంగా వడ్డీ ఉండదు. అయితే, కేవలం కనీస మొత్తాన్ని మాత్రమే చెల్లించడం లేదా చెల్లింపులను ఆలస్యం చేయడం వలన అధిక వడ్డీ ఛార్జీలు వసూలు చేస్తారు. </p>
<h2>BNPL -క్రెడిట్ కార్డ్ మధ్య వ్యత్యాసం</h2>
<p>రెండూ ఒకే ప్రయోజనాన్ని అందిస్తున్నప్పటికీ, వాటి పనితీరులో తేడాలుంటాయి. BNPL సాధారణంగా చిన్న కొనుగోళ్లు, పరిమిత-కాల చెల్లింపుల కోసం ఉపయోగిస్తారు. అయితే క్రెడిట్ కార్డులు రోజువారీ ఖర్చులు, ఆన్‌లైన్, ఆఫ్‌లైన్ షాపింగ్, ప్రయాణం, ఇతర పెద్ద చెల్లింపులకు మరింత ప్రయోజనకరంగా ఉంటాయి. క్రెడిట్ కార్డులు రివార్డ్ పాయింట్లు, క్యాష్‌బ్యాక్, ఎయిర్‌పోర్ట్ లాంజ్ యాక్సెస్, BNPLలో తరచుగా లభించని ఇతర ప్రయోజనాలను కూడా అందిస్తాయి.</p>
<h2>ఏది మంచిది?</h2>
<p>మీరు ఒక చిన్న కొనుగోలు చేసి, నిర్ణీత సమయంలోపు పూర్తి మొత్తాన్ని చెల్లించగలిగితే, BNPL ఒక మంచి ఎంపిక కావచ్చు. అయితే, మీరు క్రమం తప్పకుండా డిజిటల్ చెల్లింపులు చేస్తుంటే, మంచి క్రెడిట్ హిస్టరీని కావాలనుకుంటే, రివార్డులను ఆస్వాదించాలనుకుంటే, క్రెడిట్ కార్డ్ మరింత ప్రయోజనకరంగా ఉంటుంది.</p>
3 months ago
10 
