<p><strong>Wes Godavari Latest News:</strong> రాష్ట్ర వ్యాప్తంగా సంచలనంగా మారిన పశ్చిమగోదావరి జిల్లా ఉండి మండలం యండగొండిలో డెడ్‌బాడీ పార్శిల్‌ కేసులో రోజుకో షాకింగ్ అప్‌డేట్ వస్తోంది. పోలీసుల విచారణ లోతు పెరిగే కొద్దీ సంచలన విషయాలు వెలుగులోకి వస్తున్నాయి. కేవలం ఆస్తికోసమే పక్క ప్రణాళికతో వదిన తులసికి మరిది శ్రీధర్‌ వర్మ అలియాస్‌ సిద్ధార్ధ వర్మ డెడ్‌బాడీ పార్శిల్‌ చేసినట్టు ప్రాథమిక విచారణలో తేలింది. ఫ్యామిలీ మేటర్‌లో బలైపోయిన కూలీ పర్లయ్యను శ్రీధర్‌ వర్మ పని ఉందని నమ్మించి తీసుకెళ్లాడు, మార్గ మధ్యలో కారులోనే హతమార్చినట్టు తేలింది. </p>
<p>ఒక్కొక్కటి వీడుతున్న చిక్కుముడులను పరిశీలిస్తే మొత్తం ఈ క్రైం కథా చిత్రంలో తమ వాటాగా రావాల్సిన ఆస్తితోపాటు తులసి వాటాను కొట్టేయాలనే మాస్టర్‌ ప్లాన్‌ వేశాడు శ్రీధర్. ఇందులో తులసి సోదరి రేవతి పాత్ర ఉన్నట్టు నిర్దారించారు. ఈమె శ్రీధర్‌ వర్మ రెండో భార్య. ఈమెతోపాటు శ్రీధర్‌వర్మ మొదటి, మూడో భార్యల పాత్ర ఉంది. పోలీసుల అదుపులో ఉన్న శ్రీధర్‌వర్మ, ముగ్గురు భార్యల ద్వారా మరిన్ని నిజాలు కక్కించేందుకు పోలీసులు తమదైన శైలిలో విచారణ మరింత వేగవంతం చేశారు. </p>
<p><strong>డెడ్‌బాడీ దొరక్కిపోవడం వల్లే పర్లయ్య బలి </strong><br />వదిన ముదునూరి తులసికి శవాలంటే విపరీతమైన భయం. ఈవిషయం తన భార్య, తులసి సోదరి అయిన రేవతి ద్వారా తెలుసుకున్నాడు శ్రీధర్‌వర్మ. ఆమెను భయపెట్టి తన ప్లాన్ వర్కౌట్ చేద్దామనుకున్నాడు. అందు కోసం డెడ్‌బాడీ కోసం తీవ్ర ప్రయత్నాలు చేశాడు. కానీ డెడ్‌బాడీ మాత్రం దొరకలేదు. దీంతో కాళ్ల మండలం గాంధీనగర్‌కు చెందిన పర్లయ్యను టార్గెట్ చేశాడు. పథకం ప్రకారం పని కోసమని కారులో తీసుకెళ్లాడు. మార్గ మధ్యలో పీకకు వైరుతో బిగించి అంతమొందించాడు. ఈ విషయాన్ని పోలీసుల విచారణలో ఒప్పుకున్నట్లు తెలుస్తోంది. ఆ తరువాత ముందే రెడీ చేసుకున్నచెక్కపెట్టెలో పర్లయ్య మృతదేహం ఉంచాడు. </p>
<p>డెడ్‌బాడీ కుళ్లిపోయి పూర్తిగా గుర్తు పట్టలేని విధంగా అయ్యే వరకు మూడు నాలుగు రోజులు గుర్తుతెలియని ప్రాంతంలో ఉంచినట్టు తెలుస్తోంది. ఆ టైంలో డెడ్‌బాడీని ఎక్కడ ఉంచారనేది పోలీసులు విచారణ చేస్తున్నారు. తర్వాత కొత్తగా కట్టిస్తున్న ఇంటికి తరచూ పార్శిల్స్ వస్తున్నాయని తెలుసుకున్నారు. అలానే పెట్టను డిజైన్ చేశాడు. అలాంటి ఆటో ద్వారా పంపించినట్లు నిర్ధారణ అయ్యింది. </p>
<p><strong>మృతదేహాన్ని చూసి భయంతో తమను ఆశ్రయిస్తుందనే నమ్మకంతో..</strong><br />శవాలంటే విపరీతమైన భయం ఉన్న ముదునూరి తులసీ పార్శిల్‌లో మృతదేహం చూసిన వెంటనే తమను ఆశ్రయిస్తుందని అనుకున్నారు. దీనిని అడ్వాంటేజ్‌గా చేసుకుని ఆమెను బెదిరించి ఆస్తి మొత్తం తమ పేరుమీద రాయించుకోవచ్చన్న పక్కా ప్రణాళికతోనే ఈ ప్లాన్ చేశాడు. అయితే అక్కడే శ్రీధర్ వర్మ ప్లాన్ బెడిసికొట్టింది. శవాన్ని చూసి గట్టిగా అరవడంతో అంతా వచ్చారు. పోలీసులకు ఫోన్ చేయడం జరిగిపోయింది. ఇంతలో పోలీసుల ఎంట్రీతో అంతా అడ్డం తిరిగింది. </p>
<p><strong>ముగ్గురు భార్యల పాత్రపై లోతుగా...</strong><br />శ్రీధర్‌వర్మ అలియాస్‌ సిద్ధార్ధవర్మ రేవతితోనే కాకుండా మరో ఇద్దరు మహిళలతో సంబంధాలు ఉన్నట్లు పోలీసుల విచారణలో వెల్లడైనట్లు తెలుస్తోంది. శ్రీధర్‌వర్మను ప్రేమించి వివాహం చేసుకున్న రేవతి అన్నీ తెలిసే చేసుకున్నట్లు సమాచారం. రేవతి కంటే ముందు రాణి అనే ఆమెను వివాహం చేసుకున్నట్లు నిర్ధారణైంది. వీరితోపాటు విజయలక్ష్మి అనే యువతి కూడా సహకరించిందని విచారణలో వెల్లడైంది. ఈమెతో కూడా శ్రీధర్‌వర్మ అక్రమ సంబంధం ఉన్నట్లు అనుమానిస్తున్నారు. విజయలక్ష్మి అనే ఆమె ద్వారానే ఆటో పురమాయించి దానిలో డెడ్‌బాడీ పెట్టెను పంపించినట్లు నిర్ధారించారు పోలీసులు. </p>
<p>మొత్తం మీద ఈక్రైం స్టోరీలో చాలా లోతుల్లోకి వెళ్లి విచారించిన పోలీసులు శ్రీధర్‌వర్మ నేర ప్రవృత్తిపై కూడా మరింత లోతుగా విచారణ చేస్తున్నారు. వీరందరిని ఓ రహస్య ప్రాంతంలో ఉంచి విచారణ చేస్తున్నారు... ఏదిఏమైన నేర చరిత్ర ఉన్న శ్రీధర్‌వర్మ దుర్మార్గాలు ఇంకా అనేకం వెలుగులోకి వచ్చే అవకాశం ఉందని పోలీసు వర్గాలు చెబుతున్నాయి.. ఈ కేసును అత్యంత ప్రతిష్టాత్మకంగా తీసుకున్న ఎస్సీ అద్నాన్ న‌యీం అస్మి దర్యాప్తును కూడా అంతే వేగంగా నిర్వహిస్తున్నారు.. </p>
<p><strong>Also Read: <a title="అందంతో వల - మంత్రి నుంచి ఎంతో మంది బాధితులు - కర్ణాటక లేటెస్ట్ సెన్సేషన్ శ్వేతగౌడ" href="https://telugu.abplive.com/crime/police-has-arrested-a-woman-named-shweta-gowda-who-is-committing-harm-trap-in-karnataka-191889" target="_blank" rel="noopener">అందంతో వల - మంత్రి నుంచి ఎంతో మంది బాధితులు - కర్ణాటక లేటెస్ట్ సెన్సేషన్ శ్వేతగౌడ</a></strong></p>
11 months ago
7 
