<p>న్యూఢిల్లీ: ప్రధాని నరేంద్ర మోదీ అధ్యక్షతన జరిగిన కేంద్ర కేబినెట్ సమావేశంలో దీపావళి ముందు కేంద్ర ప్రభుత్వ ఉద్యోగులకు Dearness Allowance 3 శాతం పెంపునకు నిర్ణయం తీసుకున్నారు. ఈ పెంపు కోసం కేంద్రం రూ.10,016 కోట్లు ఆమోదించింది. అక్టోబర్ 28న జరిగిన కేబినెట్ భేటీలో తీసుకున్న నిర్ణయం ప్రకారం, DA రేటు ప్రాథమిక వేతనంలో 60 శాతం నుంచి 63 శాతానికి పెరుగుతుంది. చాలా రోజులుగా ఎదురుచూస్తున్న ఈ ప్రకటనపై అంచనాల తర్వాత, మోదీ కేబినెట్ తీసుకున్న నిర్ణయం ఉద్యోగులకు ఆర్థిక ఉపశమనం కలిగించనుంది.</p>
<h2>ఇంతకీ DA అంటే ఏమిటి?</h2>
<p>Dearness Allowance (DA) అనేది ధరల పెరుగుదలను ఎదుర్కొనేందుకు ప్రభుత్వ ఉద్యోగులకు ప్రభుత్వం ఇచ్చే అదనపు చెల్లింపుగా చెప్పవచ్చు. ఇది బేసిక్ శాలరీలో శాతంగా లెక్కించనున్నారు. ఆ సమయంలో ద్రవ్యోల్బణాన్ని పరిగణనలోకి తీసుకుని డీఏ నిర్ణయిస్తారు. ఈ భత్యం ఉద్యోగి ప్రాథమిక వేతనానికి అదనంగా చెల్లిస్తారు. రోజురోజుకూ ఖర్చులు పెరుగుతున్న వేళ వారి కొనుగోలు శక్తిని నిలకడగం ఉంచడంలో భాగంగా ప్రభుత్వాలు డీఏ ప్రకటిస్తుంటాయి. </p>
<h2>ఉద్యోగుల జీతాలు ఎంత పెరుగుతాయి?</h2>
<p>ఈ 3 శాతం డీఏ పెంపుతో ఉద్యోగులకు ప్రతి నెలా వారి ప్రాథమిక జీతాన్ని బట్టి అదనపు మొత్తం లభిస్తుంది. ఒకవేళ ఓ ఉద్యోగికి రూ.25,000 ప్రాథమిక జీతం ఉంటే.. సవరించిన 63 శాతం డీఏ ప్రకారం రూ.15,750 లభిస్తుంది. దీంతో ఇతర భత్యాలు, డిడక్షన్స్ మినహాయించి, వారి బేసిక్ శాలరీ, DA కలిపి రూ.40,750 అవుతుంది.</p>
<p>ప్రస్తుతం ఉన్న 60 శాతం డీఏ ప్రకారం, ఆ ఉద్యోగికి DAగా రూ.15,000 వచ్చేది. తాజాగా మూడు శాతం DA పెంపుతో నెలవారీ ఆదాయంలో రూ.750 అదనంగా జమ అవుతుంది. </p>
<h2>సంవత్సరానికి రెండుసార్లు DA</h2>
<p>కేంద్రం సాధారణంగా DAను ఏడాదికి 2 సార్లు సవరిస్తుంది. ఈ మార్పులు ఒక డీఏ జనవరి నుంచి, రెండో డీఏ జూలై నుంచి అమల్లోకి వస్తాయి. జనవరి సవరణపై నిర్ణయాలు సాధారణంగా మార్చి లేదా ఏప్రిల్‌లో తీసుకుంటారు. జూలై సవరణను సాధారణంగా సెప్టెంబర్ నెలలో లేదా అక్టోబర్‌లో ప్రకటిస్తుంటారు. ఈ డీఏ పెంపు ద్రవ్యోల్బణంతో అనుసంధానమైన స్థిరమైన సూత్రం ఆధారంగా నిర్ణయిస్తారు. అందువల్ల ప్రతి సవరణలో డీఏ పెంపు శాతంలో స్వల్ప వ్యత్యాసం ఉండటాన్ని గమనించవచ్చు. </p>
<h2>గతంలో డీఏ నిర్ణయాలు</h2>
<p>2014లో అధికారంలోకి వచ్చినప్పటి నుంచి ప్రధాని <a title="నరేంద్ర మోదీ" href="https://telugu.abplive.com/topic/narendra-modi" data-type="interlinkingkeywords">నరేంద్ర మోదీ</a> నేతృత్వంలోని కేంద్ర ప్రభుత్వం అనేక DA పెంపులను ప్రకటించింది. ప్రస్తుతానికి అందుబాటులో ఉన్న లెక్కల ప్రకారం చూస్తే, 2014లో ఈ కరువుభత్యం 7 శాతం పెరిగింది. ఆ తర్వాతి 3 సంవత్సరాల్లో డీఏ ప్రతి ఏడాదీ 6 శాతం చొప్పున పెంచుతూ నిర్ణయాలు తీసుకున్నారు. </p>
<p>కాగా, COVID-19 వైరస్ వ్యాప్తి ఆందోళన కలిగించిన సమయంలో మాత్రం కేంద్ర ప్రభుత్వం కొంతకాలం ఉద్యోగులకు DA పెంపులను తాత్కాలికంగా నిలిపివేసింది. నిలిపివేసిన ఆ డీఏ విడతలను తరువాత పలు దఫాలుగా విడుదల చేశారు.</p>
<p>తాజా ప్రకటన దీపావళి పండుగకు ముందు రావడంతో, పండుగ సీజన్‌కు సిద్ధమవుతున్న కేంద్ర ప్రభుత్వ ఉద్యోగులకు కేంద్ర ప్రభుత్వం శుభవార్త అందించినట్లు అయింది. దాదాపుగా ప్రతి ఏడాది ఇదే సమయంలో కేబినెట్ సమావేశమై డీఏపై నిర్ణయాలు తీసుకుంటూ వస్తోంది.</p>
<p> </p>
2 days ago
2 
