<p>హైదరాబాద్: తెలంగాణను ప్రపంచ పెట్టుబడులకు గమ్యస్థానంగా తీర్చిదిద్దడమే తమ ప్రభుత్వ లక్ష్యమని సీఎం రేవంత్ రెడ్డి (Revanth Reddy) అన్నారు. 2034 నాటికి రాష్ట్రాన్ని ఒక ట్రిలియన్ డాలర్ ఆర్థిక వ్యవస్థగా, 2047 నాటికి 3 ట్రిలియన్ డాలర్ల ఆర్థిక వ్యవస్థగా అభివృద్ధి చేయాలని లక్ష్యంగా పెట్టుకున్నట్లు వెల్లడించారు. SAMAKHYA బిజినెస్ సమ్మిట్-2026 ప్రారంభోత్సవ కార్యక్రమంలో సీఎం రేవంత్ రెడ్డి ఈ వ్యాఖ్యలు చేశారు.</p>
<p><strong>తెలంగాణ రైజింగ్‌ 2047 లక్ష్యంగా అభివృద్ధి</strong></p>
<p>2047 నాటికి భారత్ స్వాతంత్య్రం సాధించి 100 ఏళ్లు పూర్తిచేసుకోనుందని సీఎం రేవంత్ గుర్తుచేశారు. వికసిత్ భారత్ లక్ష్యాన్ని సాధించేందుకు రాష్ట్రాల సహకారం అవసరమన్నారు. ఎన్నికల సమయంలోనే రాజకీయాలు ఉండాలని, అభివృద్ధి విషయంలో అందరూ కలిసి పనిచేయాలని పిలుపునిచ్చారు. ఈ లక్ష్యంతోనే 2025లో తెలంగాణ రైజింగ్‌ 2047 విజన్ డాక్యుమెంట్‌ను విడుదల చేసినట్లు రేవంత్ రెడ్డి తెలిపారు.</p>
<p><strong>CURE, PURE, RARE లుగా రాష్ట్రాభివృద్ధి</strong></p>
<p>తెలంగాణను మూడు ప్రాంతాలుగా విభజించి అభివృద్ధి చేయాలని లక్ష్యంగా పెట్టుకున్నట్లు రేవంత్ రెడ్డి వివరించారు.</p>
<p>* CURE: ఔటర్ రింగ్ రోడ్డు లోపలి ప్రాంతంలో ఐటీ, సేవారంగం, అత్యాధునిక సాంకేతికత, ఆవిష్కరణలకు ప్రాధాన్యం.<br />* PURE: ఔటర్ రింగ్ రోడ్డు నుంచి రీజినల్ రింగ్ రోడ్డు వరకు తయారీ పరిశ్రమలు, పారిశ్రామిక పార్కులు, లాజిస్టిక్స్ రంగాల అభివృద్ధి.<br />* RARE: గ్రామీణ ప్రాంతాల్లో వ్యవసాయం, ఫుడ్ ప్రాసెసింగ్, వ్యవసాయాధారిత పరిశ్రమలు, ఉపాధి అవకాశాల కల్పన.<br />ప్రస్తుతం దేశ జీడీపీలో తెలంగాణ వాటా 5 శాతంగా ఉందని, దాన్ని 10 శాతానికి పెంచేందుకు కృషి చేస్తున్నామని సీఎం పేర్కొన్నారు.</p>
<p><strong>గ్లోబల్ స్థాయికి తెలంగాణ పారిశ్రామికవేత్తలు</strong></p>
<p>చార్మినార్ తర్వాత హైదరాబాద్‌లో వ్యాపార అభివృద్ధికి హైటెక్ సిటీ మరో కీలక కేంద్రంగా మారిందని రేవంత్ రెడ్డి అన్నారు. తెలంగాణకు చెందిన పారిశ్రామికవేత్తలు పెట్టుబడులు పెట్టి అంతర్జాతీయ స్థాయిలో ఎదగాలని ఆకాంక్షించారు. నూతన పారిశ్రామిక విధానంలో భాగస్వాములు కావాలని వ్యాపారవేత్తలకు పిలుపునిచ్చారు.</p>
<p><strong>మహిళా పారిశ్రామికవేత్తలకు ప్రోత్సాహం</strong></p>
<p>ఆర్థికాభివృద్ధిలో మహిళల భాగస్వామ్యం కీలకమని సీఎం అన్నారు. తెలంగాణలో మహిళలకు రూ.61 వేల కోట్ల బ్యాంకు లింకేజీ రుణాలు అందించినట్లు తెలిపారు. ఆర్టీసీ బస్సులు, పెట్రోల్ బంకులు, సోలార్ ప్లాంట్ల నిర్వహణలో మహిళలను యజమానులుగా ప్రోత్సహిస్తున్నామని వివరించారు. యువతతో పాటు మహిళా పారిశ్రామికవేత్తలను ప్రోత్సహించాలని సమాఖ్య ఛాంబర్ ఆఫ్ కామర్స్‌కు సూచించారు. పెట్టుబడిదారులకు ప్రభుత్వం అవసరమైన సహకారం అందిస్తుందని, మంచి విధానాలను కొనసాగిస్తుందని భరోసా ఇచ్చారు. తెలంగాణ రైజింగ్ లక్ష్యంగా ప్రభుత్వం, పారిశ్రామికవేత్తలు కలిసి కట్టుగా ముందుకు సాగాలని సీఎం రేవంత్ రెడ్డి పిలుపునిచ్చారు.</p>
2 weeks ago
2 
