<p>International Yoga Day In Vijayawada | విజయవాడ: అంతర్జాతీయ యోగా దినోత్సవాన్ని పురస్కరించుకుని ఆంధ్రప్రదేశ్ ప్రభుత్వం విజయవాడలోని ఇందిరాగాంధీ మున్సిపల్ స్టేడియంలో యోగాంధ్ర కార్యక్రమాన్ని నిర్వహించింది. ఈ మెగా యోగా డే వేడుకలో ముఖ్యమంత్రి నారా చంద్రబాబు నాయుడు, కేంద్ర మంత్రి కింజరాపు రామ్మోహన్ నాయుడు, ఐటీ శాఖ మంత్రి <a title="నారా లోకేశ్" href="https://telugu.abplive.com/topic/Nara-Lokesh" data-type="interlinkingkeywords">నారా లోకేశ్</a>‌, వ్యవసాయశాఖ మంత్రి అచ్చెన్నాయుడు, మంత్రులు సత్యకుమార్, కందుల దుర్గేశ్ తో పాటు పలువురు ప్రముఖులు, అధికారులు పాల్గొని బాబా రాందేవ్ సమక్షంలో యోగాసనాలు సాధన చేశారు.</p>
<p><br /><img src="https://feeds.abplive.com/onecms/images/uploaded-images/2026/06/21/67ef847c8f78eeb109753c8608194b671782010751203233_original.jpg" /></p>
<p>ఈ కార్యక్రమానికి ప్రముఖ యోగా గురువు బాబా రాందేవ్‌ ముఖ్య అతిథిగా విచ్చేశారు. స్టేడియానికి విచ్చేసిన వేలాది మంది ఆయన సమక్షంలో యోగాసనాలను ప్రాక్టీస్ చేశారు. సీఎం చంద్రబాబు యోగా గురువు బాబా రాందేవ్‌ పర్యవేక్షణలో ప్రాణాయామం, పలు రకాల ఆసనాలను సాధన చేయడం ఈ కార్యక్రమంలో ప్రత్యేక ఆకర్షణగా నిలిచింది.</p>
<p><br /><img src="https://feeds.abplive.com/onecms/images/uploaded-images/2026/06/21/82d0d8f7293f6b796eb857e86b8fe99d1782010765707233_original.jpg" /></p>
<p>విజయవాడలోని స్టేడియంతో పాటు 2 ప్రధాన వేదికల్లో దాదాపు 7 వేల మంది ఏకకాలంలో కూర్చొని యోగాసనాలు వేసేలా ప్రభుత్వం అన్ని రకాల ఏర్పాట్లు చేసింది. రాష్ట్రవ్యాప్తంగా ఆరోగ్యకరమైన జీవనశైలిని ప్రోత్సహించాలనే ఉద్దేశంతో కూటమి ప్రభుత్వం ఈ యోగాంధ్ర కార్యక్రమాన్ని పెద్ద ఎత్తున నిర్వహించినట్లు నిర్వాహకులు తెలిపారు. యోగాంధ్రలో భాగంగా అక్కడ చిన్నారులు చేసిన విన్యాసాలు అందర్నీ ఆకట్టుకున్నాయి.</p>
<p><strong>సీనియర్ ముఖ్యమంత్రిగానే కాదు, యోగాసనాల్లో కూడా సీనియర్..!</strong><br />యోగా దినోత్సవం సందర్భంగా యోగా గురువు రామ్‌దేవ్ బాబా ఆసక్తికర వ్యాఖ్యలు చేశారు. చంద్రబాబు సీనియర్ ముఖ్యమంత్రి మాత్రమే కాదు, యోగాసనాలు వేయడంలో కూడా సీనియర్ అంటూ చమత్కరించారు. ప్రజల ఆరోగ్యాన్ని దృష్టిలో ఉంచుకుని యోగాకు సీఎం చంద్రబాబు ఇస్తున్న ప్రాధాన్యతను రామ్‌దేవ్ బాబా ప్రశంసించారు. </p>
<p><strong>యోగాను ప్రజలకు దగ్గర చేసిన రామ్ దేవ్ బాబా: ఏపీ సీఎం చంద్రబాబు</strong><br />యోగాకు ప్రపంచస్థాయి గుర్తింపు తెచ్చిన ప్రధాని <a title="నరేంద్ర మోదీ" href="https://telugu.abplive.com/topic/narendra-modi" data-type="interlinkingkeywords">నరేంద్ర మోదీ</a>కి ఏపీ సీఎం చంద్రబాబు ధన్యవాదాలు తెలిపారు. ప్రధాని మోదీ చొరవతో 190 దేశాల్లో అంతర్జాతీయ యోగా దినోత్సవం నిర్వహిస్తున్నారు. ప్రపంచానికి భారత్ విశ్వగురుగా మారుతోందని... ప్రపంచానికి మార్గనిర్దేశం చేయగలిగే స్థాయికి భారత్ ఎదుగుతోందన్నారు. ఫిజికల్, మెంటల్ ఫిట్ నెస్ పెంచేది యోగానే అని,. యోగాను ప్రజలకు దగ్గర చేసిన రామ్ దేవ్ బాబా కృషి అమోఘం అని కొనియాడారు.</p>
<p><iframe title="YouTube video player" src="https://www.youtube.com/embed/k6E38CCawzU?si=WvKN8lMsoY9UiT7y" width="560" height="315" frameborder="0" allowfullscreen="allowfullscreen"></iframe></p>
<p><strong>అమరావతిలోని ఉండవల్లి గుహల్లో యోగా</strong><br />అమరావతిలోని చారిత్రాత్మక ఉండవల్లి గుహల సాక్షిగా 'యోగా ఫర్ హెల్తీ ఏజింగ్' థీమ్‌తో రాష్ట్ర ప్రభుత్వం శనివారం యోగాంధ్ర కార్యక్రమం నిర్వహించింది. అంతర్జాతీయ యోగా దినోత్సవం సందర్భంగా నిర్వహించిన ఈ వేడుకల్లో యోగా గురు బాబా రామ్‌దేవ్‌తో కలిసి సీఎం చంద్రబాబు, పలువురు అధికారులు, విద్యార్థులు పాల్గొని యోగాసనాలు వేశారు. యోగా మన సంస్కృతి, వారసత్వమని సీఎం <a title="చంద్రబాబు" href="https://telugu.abplive.com/topic/Chandrababu" data-type="interlinkingkeywords">చంద్రబాబు</a> పేర్కొనగా.. ఆయన దేశానికే ఒక విజనరీ లీడర్ అంటూ రామ్‌దేవ్ బాబా ప్రశంసల వర్షం కురిపించారు. ఈ సందర్భంగా వివిధ యోగా ప్రక్రియల వల్ల కలిగే ఆరోగ్య ప్రయోజనాల గురించి బాబా రాందేవ్ వివరించారు.</p>
<p> </p>
4 months ago
11 
