<p><strong>Car Cleaning Tips:</strong> కారును శుభ్రంగా ఉంచడం అనేది కేవలం అందం కోసమే కాదు. వాహనం పనితీరు, పెయింట్‌ నాణ్యత, ఇంటీరియర్‌ జీవితకాలం పెరగడానికి కూడా ఇది ఎంతో కీలకం. చాలా మంది కారును తరచూ కడిగినా, సరైన పద్ధతులు పాటించకపోవడం వల్ల తెలియకుండానే వాహనానికి నష్టం కలిగిస్తుంటారు. ముఖ్యంగా తప్పు క్లీనింగ్‌ టూల్స్‌, హార్ష్‌ కెమికల్స్‌ వాడటం వల్ల పెయింట్‌, ప్లాస్టిక్‌ భాగాలు, టచ్‌స్క్రీన్‌లు దెబ్బతినే ప్రమాదం ఉంటుంది.</p>
<p><strong>మీ ఇష్టం వచ్చిన క్లీనింగ్‌ క్లాత్‌లు వాడొద్దు</strong></p>
<p>చాలామంది పాత బట్టలు, గుడ్డలు లేదా సాధారణ టవల్స్‌తో కారును తుడుస్తుంటారు. అయితే ఇవి పెయింట్‌పై సూక్ష్మ గీతలు (మైక్రో స్క్రాచ్‌లు) పడేలా చేస్తాయి. అలాగే చక్రాలను శుభ్రం చేసిన మైక్రోఫైబర్‌ క్లాత్‌ను బాడీపై మళ్లీ ఉపయోగించకూడదు. ఎందుకంటే అందులో ఉండే దుమ్ము, ఇసుక కణాలు పెయింట్‌ను దెబ్బతీస్తాయి.</p>
<p><strong>ప్రతి భాగానికి ప్రత్యేక టూల్స్‌ ఉపయోగించాలి</strong></p>
<p>కారు బాడీ, గ్లాస్‌, వీల్స్‌, ఇంటీరియర్‌ భాగాలకు వేర్వేరు క్లీనింగ్‌ టూల్స్‌ వాడటం ఉత్తమం. ఇలా చేయడం వల్ల ఒక భాగంలోని మురికి మరో భాగానికి చేరకుండా ఉంటుంది. దీంతో కారును మరింత సమర్థవంతంగా శుభ్రం చేయవచ్చు.</p>
<p><strong>ఇంటి డిటర్జెంట్లు ఉపయోగించడం ప్రమాదకరం</strong></p>
<p>కారు కడగడానికి డిష్‌వాష్‌ లిక్విడ్‌, బాత్‌రూమ్‌ క్లీనర్లు లేదా ఇతర గృహ వినియోగ డిటర్జెంట్లు వాడకూడదు. ఇవి పెయింట్‌పై ఉండే రక్షణ పొరను దెబ్బతీస్తాయి. అలాగే ప్లాస్టిక్‌, రబ్బరు భాగాలు త్వరగా పాడయ్యే అవకాశం ఉంటుంది. అందుకే ప్రత్యేకంగా కార్ల కోసం తయారైన కార్‌ షాంపూలనే ఉపయోగించాలి.</p>
<p><strong>ఎండలో కారు కడగడం మంచిది కాదు</strong></p>
<p>నేరుగా ఎండలో కారును కడిగితే నీటి బిందువులు త్వరగా ఆవిరై మచ్చలు ఏర్పడతాయి. దీంతో మళ్లీ శుభ్రం చేయాల్సిన పరిస్థితి వస్తుంది. అలాగే ప్రెజర్‌ వాషర్‌ను చాలా దగ్గరగా ఉపయోగిస్తే పెయింట్‌, సెన్సర్లు, రబ్బరు సీల్స్‌ దెబ్బతినే ప్రమాదం ఉంది.</p>
<p><strong>సరైన విధంగా కడగడం ఎలా?</strong></p>
<p>మొదట కారుపై ఉన్న దుమ్మును నీటితో తొలగించాలి. అనంతరం ‘టూ బకెట్‌ మెథడ్‌’ పాటించడం ఉత్తమం. ఒక బకెట్‌లో శుభ్రమైన నీరు, మరో బకెట్‌లో షాంపూ మిశ్రమం ఉంచాలి. కారు పైభాగం నుంచి కిందికి కడగాలి. ఇలా చేయడం వల్ల దిగువ భాగంలోని మురికి మళ్లీ పైభాగానికి చేరదు.</p>
<p><strong>పక్షుల విసర్జనలను నిర్లక్ష్యం చేయొద్దు</strong></p>
<p>కారుపై పడిన పక్షుల విసర్జనలు, పురుగుల అవశేషాలు లేదా చెట్ల నుంచి పడిన పదార్థాలను వెంటనే తొలగించాలి. వీటిలో ఉండే యూరిక్‌ యాసిడ్‌, ఇతర రసాయనాలు పెయింట్‌ను శాశ్వతంగా దెబ్బతీయగలవు.</p>
<p><strong>టచ్‌స్క్రీన్‌లపై నేరుగా స్ప్రే చేయవద్దు</strong></p>
<p>ఆధునిక కార్లలో డిజిటల్‌ ఇన్‌స్ట్రుమెంట్‌ క్లస్టర్లు, టచ్‌స్క్రీన్‌లు ఎక్కువగా ఉంటాయి. వీటిపై నేరుగా క్లీనింగ్‌ లిక్విడ్‌ స్ప్రే చేయడం వల్ల ఎలక్ట్రానిక్‌ భాగాలు దెబ్బతినే ప్రమాదం ఉంది. ముందుగా మైక్రోఫైబర్‌ క్లాత్‌పై క్లీనర్‌ వేసి, తర్వాత స్క్రీన్‌ను శుభ్రం చేయాలి.</p>
<p><strong>కనిపించని ప్రాంతాలను కూడా శుభ్రం చేయాలి</strong></p>
<p>డోర్‌ హింజ్‌లు, డోర్‌ సిల్స్‌, ఫ్యూయల్‌ ఫిల్లర్‌ ప్రాంతం, వీల్‌ ఆర్చ్‌లు, మడ్‌ఫ్లాప్స్‌, బంపర్ల వెనుక భాగాల్లో మురికి ఎక్కువగా పేరుకుపోతుంది. వీటిని తరచూ శుభ్రం చేయకపోతే తుప్పు, దుర్వాసన, పదార్థాల క్షీణత వంటి సమస్యలు తలెత్తుతాయి.</p>
<p>కారు క్లీనింగ్‌ అనేది కేవలం నీళ్లు పోసి కడగడం మాత్రమే కాదు. సరైన టూల్స్‌, సరైన కెమికల్స్‌, సరైన పద్ధతులు ఉపయోగిస్తేనే వాహనం ఎక్కువకాలం కొత్తదానిలా కనిపిస్తుంది. చిన్న చిన్న జాగ్రత్తలు పాటించడం ద్వారా పెయింట్‌, ఇంటీరియర్‌, ఎలక్ట్రానిక్‌ భాగాలను రక్షించడంతో పాటు కార్‌ విలువను కూడా నిలబెట్టుకోవచ్చు.</p>
<p><em><strong>ఇంకా ఇలాంటి ఆటోమొబైల్‌ వార్తలు & అప్‌డేట్స్‌ - "ABP దేశం" 'ఆటో' సెక్షన్‌ని ఫాలో అవ్వండి.</strong></em></p>
4 months ago
11 
