<p><strong>Allagadda TDP Politics :</strong> నంద్యాల జిల్లా ఆళ్లగడ్డ నియోజకవర్గంలో ఇటీవల చోటుచేసుకున్న రాజకీయ పరిణామాలు, వివాదాలపై తెలుగుదేశం పార్టీ అధిష్ఠానం తీవ్ర ఆగ్రహం వ్యక్తం చేసింది. మంగళగిరిలోని పార్టీ కేంద్ర కార్యాలయంలో ఏపీ <a title="టీడీపీ" href="https://telugu.abplive.com/topic/tdp" data-type="interlinkingkeywords">టీడీపీ</a> అధ్యక్షుడు పల్లా శ్రీనివాసరావుతో ఆళ్లగడ్డ ఎమ్మెల్యే భూమా అఖిలప్రియ భేటీ అయ్యారు. ఇటీవల ప్రముఖ పుణ్యక్షేత్రం అహోబిలం లక్ష్మీనరసింహస్వామి ఆలయంలో భక్తుల తలనీలాల కాంట్రాక్టు, వేలం నిర్వహణ విషయంలో భూమా వర్గానికి, వైసీపీ స్థానిక నేతలకు మధ్య చెలరేగిన తీవ్రస్థాయి ఘర్షణలు, దాడుల విషయంలో పార్టీ అధిష్ఠానం అఖిలప్రియను పిలిపించి వివరణ కోరింది.</p>
<p><strong>అహోబిలం ఆలయంపై వివాదం </strong></p>
<p> ప్రసిద్ధ పుణ్యక్షేత్రమైన అహోబిలం దేవాలయంలో తలనీలాల రవాణా, కాంట్రాక్టుల కమిషన్ల విషయంలో భూమా అఖిలప్రియ వర్గీయులు, ముఖ్యంగా ఆమె సోదరుడు విఖ్యాత్ రెడ్డి జోక్యం చేసుకున్నారంటూ పరస్పర సవాళ్లు, ఆరోపణలు చేసుకున్నారు. ఆలయ పరిసరాల్లో ప్రతిష్టను దిగజార్చేలా నేతల మధ్య నడిచిన బహిరంగ సవాళ్లు, పోలీసు మోహరింపు కూటమి ప్రభుత్వానికి రాజకీయంగా ఇబ్బందికరంగా మారాయి. పవిత్రమైన అహోబిలం క్షేత్ర వివాదంలోకి పార్టీ ప్రజాప్రతినిధుల పేర్లు రావడంపై ముఖ్యమంత్రి నారా చంద్రబాబు నాయుడు అత్యంత ఆగ్రహంతో ఉన్నారని పల్లా శ్రీనివాసరావు అఖిలప్రియకు స్పష్టం చేశారు. </p>
<p><strong>పార్టీ వ్యవహారాల్లో భర్త జోక్యం ఉండకూడదని వార్నింగ్ </strong></p>
<p>ఈ భేటీ సందర్భంగా పార్టీ క్రమశిక్షణే పరమావధి అని, ప్రభుత్వానికి లేదా కూటమి ధర్మానికి నష్టం కలిగించేలా ప్రవర్తిస్తే ఎంతటి వారినైనా ఉపేక్షించేది లేదని పల్లా స్పష్టమైన హెచ్చరికలు జారీ చేశారు. నియోజకవర్గంలో పార్టీ కేడర్‌ను సమన్వయం చేసుకోవాలే తప్ప, వివాదాస్పద అంశాల్లో జోక్యం చేసుకుని పార్టీ ప్రతిష్టను మసకబార్చవద్దని ఆదేశించారు. అహోబిలం ఆలయ నిర్వహణ , ఇతర స్థానిక వివాదాలలో పార్టీ శ్రేణులు చట్టపరిధి దాటి వ్యవహరించకూడదని సూచించారు. ముఖ్యంగా, ఆళ్లగడ్డ నియోజకవర్గ పాలన, రాజకీయం లేదా అధికారిక వ్యవహారాల్లో అఖిలప్రియ భర్త భార్గవ రామ్ జోక్యం ఏమాత్రం ఉండకూడదని అధినేత <a title="చంద్రబాబు" href="https://telugu.abplive.com/topic/Chandrababu" data-type="interlinkingkeywords">చంద్రబాబు</a> ఖచ్చితమైన ఆదేశాలు ఇచ్చినట్లు పల్లా శ్రీనివాసరావు ఆమెకు తేల్చి చెప్పారు. గతంలో కూడా భర్త జోక్యం వల్ల ఎదురైన విమర్శలను దృష్టిలో ఉంచుకుని, నియోజకవర్గ అధికారిక బాధ్యతలను కేవలం ఎమ్మెల్యేగా అఖిలప్రియ మాత్రమే నిర్వర్తించాలని, షాడో ఎమ్మెల్యే తరహా వ్యవహారాలను ఉపేక్షించబోమని స్పష్టం చేశారు. </p>
<p><strong>మరోసారి జరగకుండా చూసుకుంటానన్న అఖిలప్రియ </strong></p>
<p>అధిష్ఠానం పిలుపుతో పార్టీ కార్యాలయానికి వచ్చిన అఖిలప్రియ.. అహోబిలం ఘటనపై, స్థానికంగా జరుగుతున్న ప్రచారంపై తన వివరణ ఇచ్చారు. భవిష్యత్తులో పార్టీ లైన్ దాటకుండా, కూటమి నియమావళిని కచ్చితంగా పాటిస్తూ నియోజకవర్గ అభివృద్ధిపైనే దృష్టి సారిస్తానని ఆమె హామీ ఇచ్చినట్లు తెలుస్తోంది. ఏదిఏమైనా, అధికారం చేపట్టిన కొత్తలోనే స్వపక్ష నేతల వివాదాలకు కరకట్ట అధిష్ఠానం గట్టి బ్రేకులు వేయడం కూటమి వర్గాల్లో చర్చనీయాంశంగా మారింది. </p>
<p><iframe class="vidfyVideo" style="border: 0px;" src="https://telugu.abplive.com/web-stories/health/what-do-rich-people-eat-for-breakfast-health-tips-254574" width="631" height="381" scrolling="no"></iframe></p>
3 months ago
7 
