<p>Ravi Teja Bhartha Mahasayulaku Wignyapthi Review In Telugu: మాస్ మహారాజా రవితేజ కథానాయకుడిగా నటించిన తాజా సినిమా 'భర్త మహాశయులకు విజ్ఞప్తి'. కిశోర్ తిరుమల దర్శకత్వం వహించారు. సుధాకర్ చెరుకూరి నిర్మాత. ఇందులో డింపుల్ హయతి, ఆషికా రంగనాథ్ హీరోయిన్లు. సునీల్, వెన్నెల కిశోర్, సత్య, మురళీధర్ గౌడ్ ఇతర పాత్రధారులు. ఈ సినిమా ఎలా ఉందంటే?</p>
<p>కథ (Bhartha Mahasayulaku Wignyapthi Story): రామ్ సత్య నారాయణ (రవితేజ) అనార్కలి పేరుతో ఓ వైన్ తయారు చేస్తాడు. స్పెయిన్‌లోని పెద్ద కంపెనీకి శాంపిల్ పంపిస్తే రిజెక్ట్ అవుతుంది. కారణం తెలుసుకుందామని అక్కడికి వెళతాడు. కంపెనీ ఎండీ మానసా శెట్టి (ఆషికా రంగనాథ్)కు దగ్గర అవుతాడు. ఓ రాత్రి ఇద్దరూ ఒక్కటి అవుతారు.</p>
<p>మగాళ్ళు ఎలా ఉండాలనేది చెప్పడానికి రోల్ మోడల్ తన భర్త అని రామ్ భార్య బాలామణి (డింపుల్ హయతి) ఎప్పుడూ గొప్పగా చెబుతుంది. భార్యను మోసం చేశానని రామ్ ఫీలవుతూ ఉంటాడు. సరిగ్గా అదే సమయంలో వైన్ ఫెస్టివల్ అటెండ్ అవ్వడం కోసం ఇండియా వస్తుంది మానస. పెళ్ళైన విషయం రామ్ తన దగ్గర దాచిన విషయం ఆమెకు తెలుస్తుంది. అప్పుడు మానస ఏం చేసింది? అటు భార్య, ఇటు మరొక మహిళ మధ్య రామ్ ఎంత నలిగిపోయాడు? </p>
<p>బాలామణికి మానస గురించి, మానసకు బాలామణి గురించి తెలిశాక ఏం చేశారు? ఇద్దరి నుంచి రామ్ సత్యనారాయణకు ఎటువంటి రియాక్షన్ వచ్చింది? చివరకు ఏమైంది? అనేది సినిమా.</p>
<p>విశ్లేషణ (Bhartha Mahasayulaku Wignyapthi Review In Telugu): కథ విషయంలో ప్రేక్షకులు క్లాస్, మాస్, ఫ్యామిలీ అని తేడాలు చూడరు. ఎంటర్‌టైన్ చేసిందా? లేదా? అనేది మాత్రమే ముఖ్యం. మాసైనా, క్లాసైనా... కథలో కోర్ పాయింట్ లేదా ఎమోషన్ ఒకటి ఉంటుంది. సినిమాను డ్రైవ్ చేసేది అదే. కామెడీతో ఎంత కవరప్ చేయాలని ప్రయత్నించినా... ఎమోషన్ మిస్ అయినప్పుడు బండి బోల్తా కొడుతుంది. 'భర్త మహాశయులకు విజ్ఞప్తి' విషయంలో అదే జరిగింది.</p>
<p>'భర్త మహాశయులకు విజ్ఞప్తి' ప్రారంభం బావుంది. స్పెయిన్ ఎపిసోడ్‌లో ఆషికా రంగనాథ్ (Ashika Ranganath)ను గ్లామర్ హైలైట్ చేస్తూ, సత్య & 'వెన్నెల' కిశోర్ కామెడీతో ఆహ్లాదకరంగా మొదలైంది. అయితే కథ ఇండియాకు షిఫ్ట్ అయ్యాక అసలు సమస్య మొదలైంది. మగాళ్ళు ఎలా ఉండాలనేది చెప్పడానికి తన భర్త రోల్ మోడల్ అని బాలామణి ఎందుకు బలంగా చెబుతుంది? అనేదానికి సరైన క్లారిటీ లేదు. అందువల్ల భార్య దగ్గర విషయం దాచానని భర్త పడే భయాన్ని, ఆందోళనను ఫీల్ అవ్వలేం. ఆ సిట్యువేషన్స్ నుంచి వచ్చే కామెడీ వర్కవుట్ అవ్వలేదు.</p>
<p>దర్శక - రచయితగా కిశోర్ తిరుమలకు అభిమానులు ఉన్నారు. 'చిత్రలహరి'లో 'నువ్వు వెళ్ళిపోయి చాలా సేపు అయ్యింది' అని మెట్రోలో కల్యాణీ ప్రియదర్శన్‌తో సాయి దుర్గా తేజ్ చెప్పే డైలాగ్‌లో ఎంతో డెప్త్ ఉంటుంది. అటువంటి డైలాగులు కిశోర్ తిరుమల నుంచి 'భర్త మహాశయులకు విజ్ఞప్తి'లో పడలేదు. ఈ సినిమాకు ఇంటర్వెల్, క్లైమాక్స్ కీలకం. ఆ రెండిటిలో ఎమోషన్ కనెక్ట్ అయ్యేలా లేదు. అయితే కామెడీలో తన మార్క్ చూపించారు కిశోర్ తిరుమల. వెన్నెల కిశోర్, సత్య, సునీల్ సీన్లు బాగా రాశారు. </p>
<p>పాటల్లో 'బెల్లా బెల్లా...' పిక్చరైజేషన్ బావుంది. అందులో రవితేజ, ఆషిక హుషారుగా స్టెప్పులు వేశారు. పాటలకు సరైన ప్లేస్‌మెంట్ కుదరలేదు. అందువల్ల 'ఇప్పుడు ఎందుకీ పాట' అనే పరిస్థితి. భీమ్స్ బీట్స్, సాంగ్స్ బావున్నా అప్రిషియేషన్ రావడం కష్టం. నేపథ్య సంగీతం బావుంది. సినిమాటోగ్రఫీ కలర్‌ఫుల్‌గా ఉంది. కథలోని రిచ్‌నెస్ తెరపై కనిపించింది.</p>
<p>Also Read:</p>
<p>రవితేజకు ఇటువంటి క్యారెక్టర్లు, సన్నివేశాలు కొత్త కాదు. ఇంతకు ముందు చేశారు. సన్నివేశాలకు తగ్గట్టు మరోసారి చేసుకుంటూ వెళ్ళారు. మోడ్రన్ క్యారెక్టర్లకు పర్ఫెక్ట్ ఛాయస్ అనేలా ఆషికా రంగనాథ్ కనిపించారు. డింపుల్ హయతి పాటల్లో గ్లామర్ షో చేశారు. సత్య, సునీల్, వెన్నెల కిశోర్, మురళీధర్ గౌడ్... ప్రతి ఒక్కరూ తమ పాత్రల పరిధి మేరకు నవ్వించారు. తారక్ పొన్నప్ప పాత్రకు ప్రారంభంలో ఇచ్చిన బిల్డప్ తర్వాత కనిపించలేదు.</p>
<p>ప్రేక్షకులకు చేసే విజ్ఞప్తి ఏమనగా... 'భర్త మహాశయులకు విజ్ఞప్తి'లో బలమైన కథ, కథనాలు లేవు. రవితేజ మాస్ పక్కన పెట్టి క్లాసీగా కనిపించారు. సెటిల్డ్ పెర్ఫార్మన్స్ చేశారు. బ్యూటిఫుల్‌గా గ్లామరస్ షో చేశారు ఆషికా రంగనాథ్. సత్య, సునీల్, 'వెన్నెల' కిశోర్ కొంత నవ్వించారు. ఎటువంటి అంచనాలు పెట్టుకోకుండా వెళితే ఆ కామెడీ ఎంజాయ్ చేయవచ్చు. లేదంటే డిజప్పాయింట్ అవుతారు. పార్టులు పార్టులుగా కొన్ని కామెడీ సన్నివేశాలు బావున్నాయంతే.</p>
<p>Also Read:</p>
<p> </p>
3 months ago
6 
