<p><strong>Beer vs Breezer Difference :</strong> బీర్‌ చేదుగా, బ్రీజర్‌ పండ్ల రుచితో తియ్యగా ఉంటుంది. అందుకే బ్రీజర్‌లో ఆల్కహాల్‌ తక్కువగా ఉంటుందని చాలామంది భావిస్తారు. కానీ ఈ రెండింటి గురించి పూర్తిగా తెలిస్తే కచ్చితంగా షాక్ అవుతారట. బ్రీజర్ గురించి చాలామంది అపోహల్లోనే ఉంటారట. మరి వీటి మధ్య తేడాలు ఏంటి? వేటిలో ఎక్కువ ఆల్కహాల్ ఉంటుంది? ఇవి ఆరోగ్యంపై ఎలాంటి ప్రభావాలు చూపిస్తుందో ఇప్పుడు తెలుసుకుందాం. </p>
<h3>బీర్‌, బ్రీజర్‌ మధ్య తేడాలు</h3>
<p>బీర్‌ను సాధారణంగా బార్లీ వంటి ధాన్యాల నుంచి తయారుచేస్తారు. ధాన్యాల్లోని షుగర్స్ ఈస్ట్‌ సాయంతో ఫెర్మెంటేషన్‌ జరగడం వల్ల ఆల్కహాల్‌ ఏర్పడుతుంది. బ్రీజర్‌ మాత్రం పండ్ల రుచులు కలిపిన ఆల్కహాలిక్‌ డ్రింక్‌. బకార్డీ బ్రీజర్‌ వంటి ఉత్పత్తుల్లో రమ్‌ ఆధారిత ఆల్కహాల్‌ ఉంటుంది. అందుకే రెండింటి రుచి, తయారీ విధానం వేర్వేరుగా ఉంటాయి.</p>
<p><strong>Also Read : <a href="https://telugu.abplive.com/lifestyle/beer-storing-tips-temperature-light-heat-quality-taste-freshness-260093" target="_blank" rel="noopener">బీరును ఫ్రిడ్జ్లో పెడుతున్నారా? అయితే ఈ విషయాలు కూడా దృష్టిలో పెట్టుకోండి</a></strong></p>
<h3>బీర్‌, బ్రీజర్‌లో ఏది స్ట్రాంగ్‌?</h3>
<p>సాధారణ బీర్‌లో ఆల్కహాల్‌ శాతం సుమారు 5 శాతం ఉండవచ్చు. బ్రీజర్‌లోనూ కొన్ని వేరియంట్లలో దాదాపు 4 నుంచి 5 శాతం వరకు ఆల్కహాల్ ఉండవచ్చు. కానీ స్ట్రాంగ్‌ బీర్‌లో ఆల్కహాల్‌ శాతం మరింత ఎక్కువగా ఉండొచ్చు. కాబట్టి బీర్‌ ఎప్పుడూ బ్రీజర్‌ కంటే స్ట్రాంగ్‌ అని చెప్పలేం. ఏది ఎక్కువ ప్రభావం చూపుతుందో తెలుసుకోవాలంటే బాటిల్‌పై ఉన్న ABV (Alcohol By Volume) చూడాలి.</p>
<h3>బ్రీజర్‌ తియ్యగా ఉంటే ఆల్కహాల్‌ ఎఫెక్ట్ తగ్గుతుందా?</h3>
<p>బీర్‌తో పోలిస్తే బ్రీజర్‌లో పండ్ల రుచి, తీపి ఎక్కువగా అనిపించవచ్చు. కానీ తీపి రుచి వల్ల ఆల్కహాల్‌ ప్రభావం తగ్గదు. అలాగే తాగుతున్నప్పుడు ఆల్కహాల్‌ రుచి అంతగా తెలియకపోవడంతో కొందరు వేగంగా లేదా ఎక్కువ పరిమాణంలో తాగే అవకాశం ఉంటుంది. అందుకే రుచిని బట్టి ఆల్కహాల్‌ పరిమాణాన్ని అంచనా వేయకూడదు.</p>
<p><strong>Also Read : <a href="https://telugu.abplive.com/lifestyle/what-happens-to-your-body-when-you-drink-beer-in-hot-weather-side-effects-risks-and-safety-tips-246218" target="_blank" rel="noopener">వేసవిలో బీర్ తాగితే నిజంగా కూల్ అవుతారా? సైడ్ ఎఫెక్ట్స్, తీసుకోవాల్సిన జాగ్రత్తలు ఇవే</a></strong></p>
<h3>క్యాలరీల్లో తేడాలు</h3>
<p>బీర్‌లో ఆల్కహాల్‌తో పాటు కార్బోహైడ్రేట్ల నుంచి కూడా క్యాలరీలు వస్తాయి. బ్రీజర్‌లో ఆల్కహాల్‌తో పాటు అదనపు చక్కెరలు ఉండే అవకాశం ఉంది. అయితే చక్కెర, క్యాలరీల పరిమాణం బ్రాండ్‌, ఫ్లేవర్‌, బాటిల్‌ పరిమాణాన్ని బట్టి మారుతుంది. బరువు తగ్గాలని ప్రయత్నిస్తున్నవారు లేదా రక్తంలో చక్కెర స్థాయులను నియంత్రించుకోవాల్సినవారు ఈ అంశాన్ని గుర్తుంచుకోవాలి. </p>
<h3>ఏది తాగితే త్వరగా మత్తు వస్తుంది?</h3>
<p>బీర్‌ తాగినా, బ్రీజర్‌ తాగినా మత్తు రావడానికి ప్రధాన కారణం శరీరంలోకి వెళ్లిన ఆల్కహాల్‌ పరిమాణమే. పానీయంలోని ఆల్కహాల్‌ శాతం, తాగిన పరిమాణం, ఎంత వేగంగా తాగారు, వ్యక్తి ఆరోగ్య పరిస్థితి వంటి అంశాలు ప్రభావం చూపుతాయి. </p>
<p><strong>Also Read : <a href="https://telugu.abplive.com/lifestyle/a-study-says-drinking-beer-can-actually-improve-your-memory-131830" target="_blank" rel="noopener">బీర్ తాగితే బొజ్జ కాదు, బుద్ది పెరుగుతుందట - కానీ, చిన్నట్విస్ట్!</a></strong></p>
<h3>ఆరోగ్యానికి ఏది మంచిది?</h3>
<p>బీర్‌ అయినా, బ్రీజర్‌ అయినా ఆరోగ్యానికి మేలు చేస్తుంది అనుకోకూడదు. ఆల్కహాల్‌ అధికంగా తీసుకోవడం వల్ల కాలేయ సమస్యలు, ప్రమాదాలు, ఇతర ఆరోగ్య సమస్యల ముప్పు పెరుగుతుంది. ఆల్కహాల్‌ తీసుకోవడం వల్ల కొన్ని రకాల క్యాన్సర్ల ప్రమాదం కూడా పెరుగుతుంది. కాబట్టి బ్రీజర్‌ పండ్ల రుచితో ఉందని ఆరోగ్యకరమైనదని, బీర్‌ కంటే మంచిది అనుకోకూడదు. </p>
<h3>తీసుకోవాల్సిన జాగ్రత్తలు</h3>
<p>పానీయం ఏదైనా ఆల్కహాల్‌ శాతాన్ని, బాటిల్‌ పరిమాణాన్ని దృష్టిలో పెట్టుకోవాలి. తక్కువ సమయంలో ఎక్కువగా తాగడం మానుకోవాలి. ఆల్కహాల్‌ తీసుకున్న తర్వాత వాహనం నడపకూడదు. గర్భిణులు, గర్భం కోసం ప్రయత్నిస్తున్నవారు, కొన్ని మందులు వాడేవారు, ఆల్కహాల్‌తో సమస్యలు తీవ్రమయ్యే ఆరోగ్య పరిస్థితులు ఉన్నవారు తాగకపోవడమే మంచిది.</p>
<p><strong>Also Read : <a href="https://telugu.abplive.com/photo-gallery/lifestyle/can-beer-really-help-flush-out-kidney-stones-fact-or-just-viral-myth-248865" target="_blank" rel="noopener">బీర్ తాగితే కిడ్నీలో స్టోన్స్ బయటకి వచ్చేస్తాయా? ఇది ఎంతవరకు నిజం?</a></strong></p>
<p><strong>గమనిక :</strong> ఈ కథనంలో అందించిన సమాచారం నిపుణులు పంచుకున్నారు. ఇది సాధారణ సమాచార ప్రయోజనాల కోసం మాత్రమే ఉద్దేశించబడింది. వృత్తిపరమైన వైద్య సలహా, రోగ నిర్ధారణ లేదా చికిత్సకు ప్రత్యామ్నాయం కాదు. వైద్య పరిస్థితికి సంబంధించి మీకు ఏవైనా ప్రశ్నలు ఉంటే, ఎల్లప్పుడూ మీ వైద్యుడు లేదా ఇతర అర్హత కలిగిన ఆరోగ్య సంరక్షణ ప్రదాత సలహా తీసుకోండి.</p>
<p> </p>
<div class="readMore"> </div>
2 weeks ago
2 
