<p><strong>Bangladeshi Muslims mother tongue Bengali:</strong> సాధారణంగా ముస్లింలు అంటే వారి మాతృభాష ఉర్దూ అనుకుంటాం. మన దేశంలో ఎన్నో రాష్ట్రాల్లో ముస్లింలు ఉన్నారు. కానీ ఏ రాష్ట్రంలో ఉన్నా వారు ఉర్దూను ప్రధానంగా నేర్చుకుంటారు. వారి మాతృభాష అదే అవుతుంది. కానీ బంగ్లాదేశ్‌లో ముస్లింలు మాత్రం ఉర్దూను అసలు నేర్చుకోరు. కనీసం ఒక్క శాతం బంగ్లా ముస్లింలకు కూడా ఆ భాష రాదు. వారందరి మాతృభాష బెంగాలీనే. నిజం చెప్పాలంటే వారు భాష కోసం ప్రాణం ఇస్తారు. బంగ్లాదేశ్ ఏర్పడటానికి ప్రధాన కారణం కూడా భాషనే. </p>
<p>ప్రపంచ పటంలో ఒక దేశం కేవలం మతం ప్రాతిపదికన కాకుండా, తన మాతృభాషను కాపాడుకోవడం కోసం పోరాడి ఆవిర్భవించిన చరిత్ర బంగ్లాదేశ్‌ది. 1947లో పాకిస్థాన్ ఏర్పడినప్పుడు, భౌగోళికంగా దూరంగా ఉన్న తూర్పు పాకిస్థాన్‌పై ప్రస్తుత బంగ్లాదేశ్ పశ్చిమ పాకిస్థాన్ పాలకులు ఉర్దూ భాషను బలవంతంగా రుద్దాలని ప్రయత్నించారు. అయితే, మెజారిటీ ప్రజలు మాట్లాడే బెంగాలీని కాదని, ఉర్దూను ఏకైక అధికారిక భాషగా ప్రకటించడాన్ని అక్కడి ప్రజలు జీర్ణించుకోలేకపోయారు. తమ సంస్కృతికి, మూలాలకు నిలయమైన భాషను కాపాడుకునేందుకు మతపరమైన సరిహద్దులను దాటి బెంగాలీలందరూ ఏకమయ్యారు. </p>
<p>1952 ఫిబ్రవరి 21న జరిగిన భాషా ఉద్యమం బంగ్లాదేశ్ చరిత్రలో ఒక మలుపు. తమ భాషా హక్కుల కోసం శాంతియుతంగా నిరసన తెలుపుతున్న ఢాకా విశ్వవిద్యాలయ విద్యార్థులపై పోలీసులు జరిపిన కాల్పుల్లో సలామ్, బర్కత్, రఫీక్ వంటి యువకులు ప్రాణాలర్పించారు. మాతృభాష కోసం రక్తం చిందించిన ఈ ఘటన ప్రపంచ చరిత్రలోనే అరుదైనది. ఈ త్యాగమే తదనంతర కాలంలో పాకిస్థాన్ నుంచి విడిపోయి, స్వతంత్ర బంగ్లాదేశ్ సాధించుకోవాలనే బలమైన ఆకాంక్షకు పునాది వేసింది. ఈ వీరుల జ్ఞాపకార్థం నిర్మించిన షహీద్ మినార్ నేటికీ బంగ్లాదేశీయులకు ఒక పవిత్ర క్షేత్రం.</p>
<p>బంగ్లాదేశ్ ఒక ముస్లిం మెజారిటీ దేశం అయినప్పటికీ, అక్కడి ప్రజల జీవనశైలి, పండుగలు, ఆచారాలు మత గ్రంథాల కంటే బెంగాలీ సాహిత్యం , సంస్కృతితోనే ఎక్కువగా ముడిపడి ఉంటాయి. రవీంద్రనాథ్ ఠాగూర్ రాసిన 'అమర్ సోనార్ బంగ్లా'ను తమ జాతీయ గీతంగా స్వీకరించడం ద్వారా వారు తమ భాషాభిమానాన్ని చాటుకున్నారు. ప్రతి ఏటా నిర్వహించే బెంగాలీ నూతన సంవత్సరం వేడుకల్లో ముస్లింలు, హిందువులు, బౌద్ధులు అనే తేడా లేకుండా అందరూ పాల్గొనడం వారి భాషా ఐక్యతకు నిదర్శనం. భాషా ప్రేమే వారిని ఒక శక్తివంతమైన దేశంగా నిలబెట్టింది.</p>
<p>తమ భాషా పోరాట ఫలితాన్ని బంగ్లాదేశ్ కేవలం తమ దేశానికే పరిమితం చేయలేదు. 1952లో జరిగిన ఆ ఉద్యమ ప్రాముఖ్యతను గుర్తించిన ఐక్యరాజ్యసమితి యునెస్కో , ఫిబ్రవరి 21వ తేదీని అంతర్జాతీయ మాతృభాషా దినోత్సవం గా ప్రకటించింది. నేడు ప్రపంచవ్యాప్తంగా అన్ని దేశాలు తమ మాతృభాషలను గౌరవించుకుంటున్నాయంటే, దానికి మూలం బంగ్లాదేశీయుల పోరాటమేనని చెబుతూటారు. ఏటా ఫిబ్రవరి నెలలో నిర్వహించే పుస్తక ప్రదర్శన ద్వారా తమ భాషా సంపదను కొత్త తరాలకు అందిస్తూ, భాషాభిమానంలో బంగ్లాదేశ్ ప్రపంచానికే ఆదర్శంగా నిలుస్తోంది. </p>
<p><iframe class="vidfyVideo" style="border: 0px;" src="https://telugu.abplive.com/web-stories/andhra-pradesh/if-you-go-to-vanajangi-never-forget-in-your-life-do-you-know-how-to-get-there-231840" width="631" height="381" scrolling="no"></iframe></p>
3 months ago
9 
