<p>Ban On Protests: పండుగల సీజన్ కావడంతో దిల్లీలో నిరసనలు, ఆందోళనల కారణంగా వ్యాపారాలు తీవ్రంగా దెబ్బతింటున్నాయని, అందుకే దీపావళి వరకు నగరంలో నిరసనలపై నిషేధం విధించాలని వ్యాపారులు కోరుతున్నారు. నగరానికి వెలుపల ఒక శాశ్వత నిరసన ప్రాంతాన్ని ఏర్పాటు చేయాలని ఛాంబర్ ఆఫ్ ట్రేడ్ అండ్ ఇండస్ట్రీ (CTI) ప్రభుత్వాన్ని కోరింది. </p>
<h3>పీఎం మోదీకి లేఖ రాసిన CTI ఛైర్మన్</h3>
<p>ఈ మేరకు CTI ఛైర్మన్ బ్రిజేష్ గోయల్ ప్రధానమంత్రి <a title="నరేంద్ర మోదీ" href="https://telugu.abplive.com/topic/narendra-modi" data-type="interlinkingkeywords">నరేంద్ర మోదీ</a>కి ఓ లేఖ రాశారు. జంతర్ మంతర్, పార్లమెంట్ స్ట్రీట్, లూటియన్స్ దిల్లీ ప్రాంతాలలో పెద్ద ఎత్తున గుమిగూడే సమావేశాలపై ఆంక్షలు విధించాలని ఆయన ఆ లేఖలో కోరారు. పదేపదే జరుగుతున్న నిరసనలు, మెట్రో సేవలలో అంతరాయాలు వ్యాపారులను, వినియోగదారుల రాకపోకలను తీవ్రంగా ప్రభావితం చేస్తున్నాయని ఆయన ఆందోళన వ్యక్తం చేశారు.</p>
<p>అక్టోబర్ 11న నవరాత్రి, రామ్‌లీలా కార్యక్రమాలతో ప్రారంభమయ్యే పండుగల సీజన్ వ్యాపారులకు ఎంతో కీలకమని, ఆ తర్వాత దీపావళి, పెళ్లిళ్ల సీజన్ కూడా వరుసగా వస్తాయని గోయల్ గుర్తుచేశారు.</p>
<h3>భారీగా పడిపోయిన వ్యాపారాలు </h3>
<p>CTI సర్వే ప్రకారం.. గత మూడు రోజులుగా దిల్లీ మార్కెట్లలో వ్యాపార కార్యకలాపాలు సుమారు 70 శాతం వరకు తగ్గాయి. షాపింగ్ కోసం దిల్లీ బయట నుంచి నగరానికి వచ్చే కస్టమర్ల సంఖ్య రోజుకు 2-3 లక్షల నుండి సుమారు 40,000-50,000కు పడిపోయింది. స్థానిక సందర్శకుల సంఖ్య కూడా 50 శాతానికి పైగా తగ్గిపోయినట్లు ఆ సంస్థ పేర్కొంది. పదేపదే మెట్రో స్టేషన్లు మూసివేయడం, ట్రాఫిక్ రద్దీ ప్రజలను మార్కెట్లకు రాకుండా నిరుత్సాహపరుస్తున్నాయని తెలిపారు.<br /><br />Also Read: <a title=" భారత్‌లో స్టార్‌లింక్‌కు అడ్డుకట్ట - ఎలాన్ మస్క్ సంచలన ఆరోపణలు .. పేర్లు బయటపెట్టాలన్న కేటీఆర్!" href="https://telugu.abplive.com/business/elon-musk-accuses-indian-oligarchs-starlink-blocking-ktr-demands-names-260979" target="_self"> భారత్‌లో స్టార్‌లింక్‌కు అడ్డుకట్ట - ఎలాన్ మస్క్ సంచలన ఆరోపణలు .. పేర్లు బయటపెట్టాలన్న కేటీఆర్!</a></p>
<h3>ప్రజాస్వామ్య హక్కులకు గౌరవం </h3>
<p>"ప్రజాస్వామ్యంలో శాంతియుత నిరసన తెలిపే హక్కును మేము పూర్తిగా గౌరవిస్తాం. అయితే, పండుగ సీజన్‌కు ముందు సెంట్రల్ దిల్లీలో వేలాది మంది నిరసనలకు దిగినప్పుడు, అది వ్యాపారులను నేరుగా నష్టాలపాలు చేస్తుంది" అని బ్రిజేష్ గోయల్ అన్నారు. జంతర్ మంతర్, ఇతర ప్రదేశాలలో 1,000 మందికి పైగా పాల్గొనే ప్రదర్శనల కోసం ప్రభుత్వం కొత్త మార్గదర్శకాలు జారీ చేయాలని CTI ప్రధాన కార్యదర్శి గుర్మీత్ అరోరా అభిప్రాయపడ్డారు.</p>
<p>సెంట్రల్ దిల్లీ వెలుపల ఒక పర్మినెంట్ ప్రదేశాన్ని నిరసనల కోసం ఏర్పాటు చేయాలని CTI వర్గాలు ప్రతిపాదించాయి. ఇందుకు బురారి లేదా రామ్‌లీలా మైదాన్‌లను సరైన ప్రదేశాలుగా సూచించాయి. కాగా, ప్రధాన ఎన్నికల కమిషనర్ జ్ఞానేష్ కుమార్ రాజీనామా చేయాలని డిమాండ్ చేస్తూ అక్టోబర్ 10న దిల్లీలో నిరసనలకు పిలుపునిచ్చిన నేపథ్యంలో వ్యాపారుల నుంచి ఈ డిమాండ్లు తెరపైకి రావడం గమనార్హం.<br /><br />Also Read: <a title="అమెరికాలో ఐటీ దిగ్గజాలకు భారీ షాక్ - పెర్మ్ సస్పెన్షన్.. భారత టెక్కీల గ్రీన్ కార్డ్ ఆశలు గల్లంతు!" href="https://telugu.abplive.com/news/us-suspends-perm-labor-certification-tcs-infosys-wipro-green-card-impact-261055" target="_self">అమెరికాలో ఐటీ దిగ్గజాలకు భారీ షాక్ - పెర్మ్ సస్పెన్షన్.. భారత టెక్కీల గ్రీన్ కార్డ్ ఆశలు గల్లంతు!</a></p>
3 weeks ago
2 
