<p>Andhra Pradesh Top News | అమరావతి: ఎల్‌నినో వల్ల ఎదురయ్యే వర్షాభావ పరిస్థితులను ముందుగానే అంచనా వేసి, రైతులను, పంటలను కాపాడేందుకుఏపీ ప్రభుత్వం సమగ్ర కార్యాచరణ చేపట్టిందని రాష్ట్ర వ్యవసాయ శాఖ మంత్రి కింజరాపు అచ్చెన్నాయుడు తెలిపారు. ఎల్‌నినోను ఎదుర్కొనేందుకు తాము ముందస్తు చర్యలు చేపడుతుంటే, మాజీ ముఖ్యమంత్రి వైఎస్ జగన్‌మోహన్‌రెడ్డి ప్రజలను తప్పుదోవ పట్టించేలా దుష్ప్రచారం చేస్తున్నారని మండిపడ్డారు. ఏపీ సీెం నారా చంద్రబాబు నాయుడు ఏప్రిల్ 2026లోనే ‘జలధార’ కార్యక్రమంపై సమీక్ష నిర్వహించారని తెలిపారు. క్షేత్రస్థాయి చర్యల ఫలితంగా ఏపీలో భూగర్భ జలాలు 0.79 మీటర్లు పెరిగాయని, ప్రస్తుతం 625 టీఎంసీల భూగర్భ జలాలు అందుబాటులో ఉన్నాయని వెల్లడించారు. ‘జలధార–జలహారతి’ కార్యక్రమం కింద రూ.3,409.35 కోట్ల వ్యయంతో 79,826 పనులను కూటమి ప్రభుత్వం పూర్తి చేసిందన్నారు. </p>
<p><strong>రెండేళ్లు ఖరీఫ్ ప్రీమియం ఎగ్గొట్టిన జగన్ సర్కార్</strong></p>
<p>పంటల బీమా గురించి మాట్లాడే నైతిక అర్హత జగన్‌కు లేదని మంత్రి అచ్చెన్నాయుడు తీవ్రస్థాయిలో ధ్వజమెత్తారు. వైసీపీ ఐదేళ్ల పాలనలో ఖరీఫ్‌లో మూడేళ్లు మాత్రమే ప్రీమియం చెల్లించి రెండేళ్లు వదిలేశారని, రబీకి ఒక్క ఏడాది కూడా ఇన్సూరెన్స్ కట్టలేదని ఎద్దేవా చేశారు. ఆ బకాయిల భారాన్ని ఇప్పుడు కూటమి ప్రభుత్వం చెల్లిస్తూ రైతులకు రక్షణ కల్పిస్తోందన్నారు. దేశంలోనే పంటల బీమా నమోదులో ఆంధ్రప్రదేశ్ అగ్రస్థానంలో నిలిచిందని, బీమా నిధులను ఎస్క్రో ఖాతాలో అందుబాటులో ఉంచడం ద్వారా తొలిసారిగా రూ.16 వేల కోట్ల విలువైన పంటలకు బీమా నమోదు జరిగిందన్నారు. </p>
<p>రాష్ట్రంలో జూన్ నుంచి ఆగస్టు కాలంలో సాధారణ వర్షపాతం 350 మి.మీ. కాగా 170.9 మి.మీ. మాత్రమే నమోదు కావడంతో ఈ ఏడాది 51.2 శాతం వర్షపాత లోటు ఏర్పడిందని తెలిపారు. ఎల్‌నినో ప్రభావాన్ని ఎదుర్కొనేందుకు ఫిబ్రవరి 2026 నుంచే ముందస్తు కార్యాచరణను ప్రారంభించి, శాస్త్రీయ సమాచారం, శాటిలైట్ పర్యవేక్షణ ఆధారంగా పంచసూత్రాలను అమలు చేస్తున్నామని అచ్చెన్నాయుడు తెలిపారు. 8,489 రైతు సేవా కేంద్రాల (RSK) పరిధిలో 1,357 RSKలను హై రిస్క్‌గా, 2,077 RSKలను మోడరేట్ రిస్క్‌గా గుర్తించామని చెప్పారు. వర్షాధార ప్రాంతాల్లో PMDS, సీడ్ పెల్లెటింగ్‌ను ప్రోత్సహిస్తూ 23 లక్షల మంది రైతులు 25 లక్షల ఎకరాల్లో ఈ విధానాలను అనుసరిస్తున్నారని తెలిపారు. నీటి లభ్యతకు అనుగుణంగా వరికి ప్రత్యామ్నాయంగా పప్పుధాన్యాలు, చిరుధాన్యాలను ప్రోత్సహిస్తున్నామని పేర్కొన్నారు.</p>
<p>ఆగస్టు 7, 2026న ప్రారంభించిన ‘రైతన్న మీ కోసం–El Nino Mitigation Plan’ ద్వారా 46.86 లక్షల మంది రైతులకు సంబంధించిన 2.75 కోట్ల కమతాలను పరిశీలిస్తూ ప్రతి కమతానికి ప్రత్యేక సలహాలు అందిస్తున్నామని పేర్కొన్నారు. పంటల బీమా దరఖాస్తులను 2025లో 19.5 లక్షల నుంచి 2026లో 35.15 లక్షలకు పెంచామని, రుణం లేని రైతుల సంఖ్యను 2 లక్షల నుంచి 27.5 లక్షలకు పెంచామని తెలిపారు. అలాగే, నిబంధనలకు అనుగుణంగా యానిమల్ షెల్టర్ల సంఖ్యను గత ఏడాది ఉన్న 15,303 నుంచి ఈ ఏడాది 20,000కు పెంచే లక్ష్యంతో పనిచేస్తున్నామని వివరించారు.</p>
<p>వైసీపీ హయాంలో వ్యవసాయ అభివృద్ధిపై జగన్ కనీసం ఒక్క సమీక్షా నిర్వహించలేదని, కూటమి ప్రభుత్వంలో ముఖ్యమంత్రి చంద్రబాబు అధ్యక్షతన నెలకు రెండుసార్లు వ్యవసాయ రంగాన్ని సమీక్షిస్తున్నామని తెలిపారు. నీటి వనరుల సంరక్షణకు ప్రాధాన్యమిచ్చే చంద్రబాబును ‘వాటర్ మ్యాన్’ అని పిలుస్తారన్నారు. వైసీపీ హయాంలో నిర్లక్ష్యానికి గురైన మైక్రో ఇరిగేషన్ బకాయిలు రూ.1,100 కోట్లను కూటమి ప్రభుత్వం చెల్లిస్తూ డ్రిప్ ఇరిగేషన్‌లో ఏపీని దేశంలోనే అగ్రస్థానంలో నిలిపిందన్నారు. రాయలసీమను ‘రతనాల సీమ’గా మార్చేందుకు కేంద్ర అనుమతులతో రూ.40 వేల కోట్ల ప్రభుత్వ, రూ.60 వేల కోట్ల ప్రైవేట్ పెట్టుబడులతో మొత్తం రూ.1 లక్ష కోట్లతో హార్టికల్చర్ హబ్ ఏర్పాటు చేస్తున్నామని తెలిపారు.</p>
<p>వర్షాభావ పరిస్థితులను తట్టుకునేందుకు మొదటి విడతలో 47,321 క్వింటాళ్ల విత్తనాలు, ఆగస్టు 15 తర్వాత అదనపు అవసరాల కోసం మరో 1.12 లక్షల క్వింటాళ్ల విత్తనాలను సిద్ధం చేశామని మంత్రి అచ్చెన్నాయుడు తెలిపారు. ఆగస్టు 3 నుంచే ‘రైతన్నా మీకోసం’ వారోత్సవాల ద్వారా ప్రత్యామ్నాయ పంటలపై అవగాహన కల్పిస్తున్నాం.. 6.30 లక్షల హెక్టార్లలో PMFBY, RWBCIS కింద బీమా కవరేజీ కల్పించడంతో పాటు వరి బీమా నమోదు గడువును ఆగస్టు 31 వరకు పొడిగించామని పేర్కొన్నారు. రాష్ట్రంలో ప్రస్తుతం 5 నెలలకు సరిపడా పశుగ్రాసం అందుబాటులో ఉందని, కొరత ఉన్న ప్రాంతాలకు తరలించేందుకు స్పష్టమైన ట్రాన్స్‌పోర్ట్ ప్లాన్ సిద్ధం చేశామన్నారు. వైసీపీ పాలనలో తెలంగాణ అక్రమ ప్రాజెక్టులు నిర్మిస్తున్నప్పుడు మౌనంగా ఉన్న <a title="జగన్" href="https://telugu.abplive.com/topic/cm-jagan" data-type="interlinkingkeywords">జగన్</a>, ఇప్పుడు ప్రభుత్వంపై అసత్యాలు ప్రచారం చేస్తున్నారని, <a title="చంద్రబాబు" href="https://telugu.abplive.com/topic/Chandrababu" data-type="interlinkingkeywords">చంద్రబాబు</a> నాయకత్వంలో ప్రతి రైతును, ప్రతి పంటను కాపాడటమే తమ ప్రభుత్వ లక్ష్యమని వ్యవసాయశాఖ మంత్రి స్పష్టం చేశారు.</p>
1 month ago
3 
