<p><strong>Indian Para Athletes Shatter Multiple World Records To Propel Nation Past Hundred Medal Milestone: </strong>ఐచి నగోయా వేదికగా జరుగుతున్న ఆసియా పారా గేమ్స్ 2026 ఐదో రోజు భారత పారా అథ్లెట్లు తిరుగులేని ఆధిపత్యాన్ని ప్రదర్శించారు. ప్రపంచ రికార్డులను బద్దలు కొడుతూ పసిడి పతకాల పంట పండించారు. మహిళల 50 మీటర్ల రైఫిల్ 3 పొజిషన్స్ ఎస్‌హెచ్1 విభాగంలో స్టార్ షూటర్ మోనా అగర్వాల్ 357.5 స్కోరుతో సరికొత్త ప్రపంచ రికార్డు నెలకొల్పి ఈ గేమ్స్‌లో తన రెండో బంగారు పతకాన్ని ముద్దాడింది. చైనా క్రీడాకారిణి కుయిపింగ్ జాంగ్‌ను ఏకంగా 3.8 పాయింట్ల భారీ ఆధిక్యంతో ఓడించి భారత విజయయాత్రకు నాయకత్వం వహించింది. అటు ట్రాక్ అండ్ ఫీల్డ్‌లోనూ భారత జోరు కొనసాగింది. పురుషుల టి44 కేటగిరీ 400 మీటర్ల పరుగు పందెంలో సందీప్ కుమార్ 52.28 సెకన్లలో లక్ష్యాన్ని చేరుకుని నయా ప్రపంచ రికార్డుతో స్వర్ణం సొంతం చేసుకున్నాడు. ఈ విజయంతో భారత్ పతకాల సంఖ్యను 100 దాటించి సరికొత్త మైలురాయిని అధిగమించింది. ఇదే రేసులో మరో భారత రన్నర్ అజయ్ కుమార్ 53.61 సెకన్లతో కాంస్య పతకాన్ని గెలుచుకున్నాడు. ఫీల్డ్ ఈవెంట్లలో జావెలిన్ త్రోయర్ హనీ అద్భుత ప్రదర్శన కనబరిచాడు. ఎఫ్37 విభాగంలో తన ఆఖరి ప్రయత్నంలో ఏకంగా 60.49 మీటర్ల దూరం ఈటెను విసిరి సరికొత్త ప్రపంచ రికార్డుతో బంగారు పతకాన్ని ఎగురేసుకుపోయాడు. గతంలో సాధించిన డిస్కస్ త్రో కాంస్యానికి తోడుగా ఈ స్వర్ణం అతడి ఖాతాలో చేరింది.</p>
<p>Read Also: <a title="Brook Historic Blitz: గిల్ రికార్డును తుత్తునియలు చేసిన ఇంగ్లండ్ కెప్టెన్.. వన్డేల్లో ఫాస్టెస్ట్ డబుల్ సెంచరీతో హ్యారీ బ్రూక్ వరల్డ్ రికార్డు" href="https://telugu.abplive.com/sports/cricket/harry-brook-smashes-fastest-double-century-in-odi-cricket-history-against-sri-lanka-262114" target="_self">Brook Historic Blitz: గిల్ రికార్డును బద్దలు కొట్టిన ఇంగ్లండ్ కెప్టెన్.. వన్డేల్లో ఫాస్టెస్ట్ డబుల్ సెంచరీతో హ్యారీ బ్రూక్ వరల్డ్ రికార్డు</a></p>
<p><strong>ఆర్చరీలో చైనా చిత్తు: రికర్వ్ టీమ్ స్వర్ణ గర్జన</strong><br />పారా ఆర్చరీ పురుషుల రికర్వ్ టీమ్ ఈవెంట్‌లో భారత ద్వయం హర్విందర్ సింగ్, విజయ్ సుండి అద్భుత ప్రతిభతో బంగారు పతకాన్ని కైవసం చేసుకున్నారు. ఫైనల్ పోరులో చైనా జోడీని 5-1 తేడాతో చిత్తు చేశారు. తొలి సెట్‌ను 35-35తో సమం చేసిన భారత ఆర్చర్లు, తర్వాతి రెండు సెట్లలో 37-36, 38-36తో పైచేయి సాధించి ఆ రోజు భారత్‌కు తొలి స్వర్ణాన్ని అందించారు. అయితే మహిళల రికర్వ్ డబుల్స్ ఫైనల్లో భావన, పూజ జోడీ 0-6తో చైనా చేతిలో పోరాడి ఓడిపోయి రజతంతో సరిపెట్టుకుంది.</p>
<p>Read Also: <a title="Record T20I Chase: IND VS NZ Result Update: : టీమిండియా స్ట‌న్నింగ్ విక్ట‌రీ.. కివీస్ పై తొలి టీ20లో ఘ‌న విజ‌యం.. స‌త్తా చాటిన సంజూ, శ్రేయ‌స్, న‌మ‌న్," href="https://telugu.abplive.com/sports/cricket/india-pulls-off-highest-successful-t20i-run-chase-against-new-zealand-262106" target="_self">Record T20I Chase: IND VS NZ Result Update: : టీమిండియా స్ట‌న్నింగ్ విక్ట‌రీ.. కివీస్ పై తొలి టీ20లో ఘ‌న విజ‌యం.. స‌త్తా చాటిన సంజూ, శ్రేయ‌స్, న‌మ‌న్,</a></p>
<p><strong>బ్యాడ్మింటన్ లో ఆల్ ఇండియా ఫైనల్: నితీష్ కుమార్ కు స్వర్ణం</strong><br />పారా బ్యాడ్మింటన్ పురుషుల సింగిల్స్ ఎస్ఎల్3 కేటగిరీలో భారత అగ్రశ్రేణి షట్లర్ల మధ్య హోరాహోరీ పోరు సాగింది. తుది సమరంలో ప్రమోద్ భగత్‌ను ఓడించిన నితీష్ కుమార్ బంగారు పతకాన్ని గెలుచుకోగా, ప్రమోద్‌కు సిల్వర్ మెడల్ దక్కింది. మహిళల సింగిల్స్ ఎస్‌యు5 ఫైనల్లో తులసిమతి మురుగేశన్ 18-21, 11-21 తేడాతో చైనాకు చెందిన కియుక్సియా యాంగ్ చేతిలో ఓటమి పాలై రజత పతకం సాధించింది.</p>
<p><strong>అథ్లెటిక్స్ లో ప్రమోద్ సిల్వర్: హాంగ్జౌ ఫీట్ రిపీట్</strong><br />పురుషుల 1500 మీటర్ల టి46 పరుగు పందెంలో ప్రమోద్ 4:09.65 నిమిషాల సమయంతో రెండో స్థానంలో నిలిచి సిల్వర్ మెడల్ అందుకున్నాడు. మూడేళ్ల క్రితం హాంగ్జౌలో సాధించిన రజతాన్ని నిలబెట్టుకుంటూ భారత పతకాల సంఖ్యను మరింత ముందుకు తీసుకెళ్లాడు.</p>
1 week ago
2 
