<p>AP Elections: స్థానిక సంస్థల ఎన్నికల నామినేషన్ల ప్రక్రియ తుది దశకు చేరడంతో.. ఎలాంటి ఆటంకాలు కలగకుండా పటిష్ట భద్రతా చర్యలు చేపట్టాలని రాష్ట్ర ఎన్నికల కమిషనర్ (SEC) అనిల్ చంద్ర పునేఠా తెలిపారు. ప్రతి అభ్యర్థి స్వేచ్ఛగా, ప్రశాంత వాతావరణంలో నామినేషన్‌ను దాఖలు చేసుకునేలా అన్ని జాగ్రత్తలు తీసుకోవాలని అధికారులను ఆదేశించారు.</p>
<h3>కలెక్టర్లతో అత్యవసర సమీక్ష </h3>
<p>పలు రాజకీయ పార్టీల నేతల నుంచి వచ్చిన ఫిర్యాదులతో ఎస్ఈసీ అనిల్ చంద్ర పునేఠా శనివారం అధికారులతో అత్యవసర సమావేశం నిర్వహించారు. రాయచోటి, పులివెందుల, తిరుపతి, దర్శి, రాజంపేట, దాచేపల్లి ప్రాంతాల్లోని నామినేషన్ కేంద్రాల వద్ద చెలరేగిన ఉద్రిక్తతలపై ఆయా జిల్లాల కలెక్టర్లు, ఎస్పీలతో ఫోన్‌లో మాట్లాడి క్షేత్రస్థాయిలో పరిస్థితిని సమీక్షించారు. ఈ సమీక్షలో ఎన్నికల కమిషన్ కార్యదర్శి డాక్టర్ మల్లికార్జున, ఐజీ బి.రాజకుమారి లు పాల్గొన్నారు.</p>
<h3>భారీ బందోబస్తు </h3>
<p>మున్సిపల్ ఎన్నికల నామినేషన్ల దాఖలుకు ఆదివారం చివరి రోజు కావడంతో నామినేషన్ కేంద్రాల వద్ద భద్రతను పెంచాలని కమిషనర్ సూచించారు. చివరి రోజున అభ్యర్థులు, మద్దతుదారులు భారీ సంఖ్యలో తరలివచ్చే అవకాశం ఉండడంతో, ఎలాంటి అవాంఛనీయ సంఘటనలు చోటుచేసుకోకుండా పోలీసు బలగాలను మోహరించాలని ఆదేశించారు.<br /><br />Also Read: <a title="పులివెందులలో హైటెన్షన్.. నామినేషన్ కేంద్రం వద్ద వైసీపీ, టీడీపీ బాహాబాహీ.. గాల్లోకి 6 రౌండ్ల కాల్పులు!" href="https://telugu.abplive.com/andhra-pradesh/high-tension-in-pulivendula-ycp-tdp-clashes-during-nominations-police-fire-6-rounds-in-air-261755" target="_self">పులివెందులలో హైటెన్షన్.. నామినేషన్ కేంద్రం వద్ద వైసీపీ, టీడీపీ బాహాబాహీ.. గాల్లోకి 6 రౌండ్ల కాల్పులు!</a></p>
<h3>ఎలక్షన్ కమిషన్ కీలక మార్గదర్శకాలు </h3>
<ul>
<li>హైకోర్టు మార్గదర్శకాల ప్రకారం అన్ని నామినేషన్ కేంద్రాల వద్ద తక్షణమే సీసీటీవీ కెమెరాలను ఏర్పాటు చేసి నిఘా పెట్టాలి.</li>
<li>ప్రజాస్వామ్యానికి కట్టుబడి అర్హులైన ప్రతి అభ్యర్థికి నామినేషన్ వేసే స్వేచ్ఛాయుత వాతావరణం కల్పించాలి. </li>
<li>చట్టాన్ని ఉల్లంఘించి నామినేషన్లను అడ్డుకునే వారిపై చట్టప్రకారం కఠిన చర్యలు తీసుకోవాలని ఐజీ బి.రాజకుమారి ఎస్పీలను ఆదేశించారు.</li>
<li>భయాందోళనలకు గురిచేసే ఘటనలు ఎక్కడైనా తలెత్తితే అధికారులు తక్షణమే స్పందించి పరిస్థితిని అదుపులోకి తీసుకురావాలని ఆదేశించారు. <br /><br />Also Read: <a title="పట్టణ స్థానిక సంస్థల ఎన్నికలు.. టీడీపీ అభ్యర్థుల రెండో జాబితా విడుదల" href="https://telugu.abplive.com/andhra-pradesh/amravati/tdp-releases-second-list-of-candidates-for-ap-municipal-elections-2026-261758" target="_self">పట్టణ స్థానిక సంస్థల ఎన్నికలు.. టీడీపీ అభ్యర్థుల రెండో జాబితా విడుదల</a></li>
</ul>
1 week ago
2 
