<p><strong>Andhra Goa Beach Festival: </strong>సువిశాల సాగ‌ర‌తీరం.. తెలుపు వ‌ర్ణంలో ఆక‌ట్టుకునే తీరంలోని ఇసుక తిన్నెలు.. కాసేపు తీరంలో గ‌డిపితే మ‌న‌సుకు, త‌న‌వుకు తాకుతూ అవ‌ధులు లేని ఉత్సాహాన్ని ఇచ్చే పిల్ల‌తిమ్మెర‌లు.. అల్లంత దూరంలోనే ప‌చ్చ‌ని తీవాచీ నిల‌బెట్టిన చందంగా క‌నిపించే స‌రుగుడు తోట‌లు.. బీచ్ కు వెళ్లే ముందే రా ర‌మ్మ‌ని ఆహ్వానం ప‌లికే ఉప్పుటేరుల్లో బోట్ షికార్లు.. ఇక నోరూరించే ఘుమ‌ఘుమ‌ల ప‌సందైన గోదావ‌రి వంట‌కాలు.. ఇక సంస్కృతి సంప్ర‌దాయాల‌ను ప్ర‌తిబింభించేలా ప్ర‌త్యేక కార్య‌క్ర‌మాలు.. జాతీయ స్థాయిలో క్రీడా పోటీలు.. రాత్రి అయితే చాలు వినోద కార్య‌క్ర‌మాలు.. ఇలా ఒక్క‌టేమిటి.. అన్ని హంగుల‌తోనూ ఈ సారి సంక్రాంతి పండుగ‌ను అదిరిపోయే స్థాయిలో ప్లాన్‌చేస్తున్నారు. ఎక్క‌డ అనుకుంటున్నారా.. అదేనండీ ఆంధ్రా గోవా.. అంబేడ్క‌ర్ కోన‌సీమ జిల్లా ప‌రిధిలోని ఉప్ప‌ల‌గుప్తం మండ‌లం సూర‌సాన యానాం బీచ్‌లో క‌ళ్లు మిరుమిట్లు గొలిపేలా సంక్రాంతి పండుగ సంబంరం బీచ్ ఫెస్టివ‌ల్‌గా ప్లాన్ చేస్తున్నారు. </p>
<h3>మూడు నెల‌లు ముందే ప‌క్కా ప్ర‌ణాళిక‌తో..</h3>
<p>సంక్రాంతి పండుగ‌కు ఇంకా మూడు నెల‌ల స‌మ‌యం ఉంది. అయినా ముంద‌స్తుగానే అమ‌లాపురం ఎమ్మెల్యే అయితాబ‌త్త‌ల ఆనంద‌రావు, కోన‌సీమ జిల్లా క‌లెక్ట‌ర్ ఆర్‌.మ‌హేష్‌కుమార్‌ సార‌థ్యంలో ప‌క్కాగా మౌలిక స‌దుపాయాల క‌ల్ప‌న‌కు భారీగా నిధులు విడుద‌ల చేయ‌డంతోపాటు చ‌మురు, స‌హ‌జ వాయు సంస్థ‌ల సీఎస్సార్ నిధుల ద్వారా ప‌క్కా ఏర్పాట్లు చేస్తున్నారు. ఇందులో భాగంగా యానాం బీచ్ లో అధికారులు ప‌ర్య‌టించి ప్ర‌ణాళిక సిద్ధం చేశారు. సంక్రాంతి పండుగ మూడు రోజులు ఇక్క‌డికి స్థానికుల‌తో పాటు ఇత‌ర ప్రాంతాల నుంచి భారీ స్థాయిలో త‌ర‌లివ‌చ్చే అవ‌కాశాలు ఉండ‌డం వ‌ల్ల రోడ్లు అభివృద్ధి, ప‌ర్యాట‌కులు ఉండేందుకు రిసార్ట్స్‌లు, తాగునీటి స‌దుపాయం, మ‌రుగుదొడ్లు, భ‌ద్ర‌త‌, ర‌వాణా స‌దుపాయం ఇలా అనేక అంశాల‌పై ప‌రిశీలించి ముంద‌స్తు ఏర్పాట్లకు గ్రీన్ సిగ్న‌ల్ ఇచ్చారు. </p>
<h3>ఇప్ప‌టికే పూర్త‌యిన ప‌క్కా రోడ్లు...</h3>
<p>యానాం బీచ్ వ‌ర‌కు నేరుగా భారీ వాహ‌నాలు సైతం వెళ్లేలా ప‌క్కా సీసీ రోడ్లు నిర్మాణం ఇప్ప‌టికే పూర్తయ్యాయి. బీచ్ ఫెస్టివ‌ల్‌కు వ‌చ్చే క్రౌడ్ ఎక్కువ‌గా ఉండ‌నున్న నేప‌థ్యంలో గ‌తేడాది అనుభ‌వాల‌ను దృష్టిలో పెట్ట‌కుని ఇన్ రోడ్‌.. ఔట్ రోడ్డు లెక్క‌న రెండు విశాల‌మైన సీసీ రోడ్లు నిర్మాణాలు చేప‌ట్టారు. ట్రాఫిక్‌కు ఎటువంటి అవాంత‌రాలు క‌లుగ‌కుంండా ఈ ఏర్పాట్లు చేశారు. సుదూర ప్రాంతాల‌ నుంచి వ‌చ్చే ప‌ర్యాట‌ల‌కుల‌కు హాస్ప‌ిటాలిటీ స‌దుపాయం, ఇత‌ర స‌దుపాయాల‌తోపాటు మూడు నెల‌ల వ్య‌వ‌ధిలో నిర్మించేలా ప్ర‌ణాళిక‌లు సిద్ధం చేసిన‌ట్లు అధికారులు వెల్ల‌డించారు..</p>
<h3>జాతీయ స్థాయి మ‌హిళా క్రీడా సంబ‌రం..</h3>
<p>గ‌తేడాది జాతీయ స్థాయి మ‌హిళా బీచ్ వాలీబాల్ పోటీలు భారీ స్థాయిలో నిర్వ‌హించారు. ఈ ఏడాది కూడా అంత‌కంటే భారీ స్థాయిలో సంక్రాంతి పండుగ‌కు ముందే నిర్వ‌హించాల‌ని ఆలోచ‌న‌లో ఉన్నామంటున్నారు. దీనికి తోడు ప‌గ‌టి పూట బోట్ షికార్‌, బీచ్ సాండ్ వెహిక‌ల్స్‌, స్కై డ్రైవింగ్‌, బెలూన్ డైవింగ్ ఇలా ప‌లు అడ్వెంచ‌ర్ ఈవెంట్స్ నిర్వ‌హించేందుకు కూడా స‌న్నాహాలు చేస్తున్నారు. </p>
<h3>బీచ్‌లోనే సంక్రాంతి సంబ‌రాలు..</h3>
<p>తెలుగువారి పెద్ద పండుగ అయిన సంక్రాంతి 3 రోజులు కూడా యానాం బీచ్‌లోనే భారీ ఎత్తులో సంక్రాంతి సంబ‌రాలు నిర్వ‌హించ‌నున్న‌ట్లు నిర్వ‌హ‌ణ క‌మిటీ తెలిపింది. దీనికోసం ఇప్ప‌టి నుంచే అన్ని ఏర్పాట్లు దిశ‌గా కృషిచేస్తున్నామ‌న్నారు. భారీ భోగి మంట‌ల నుంచి రంగ‌వ‌ల్లుల అలంక‌ర‌ణ త‌దిత‌ర సంస్కృతి సంప్ర‌దాయాలు ప్ర‌తిబింభించేలా పండుగ నిర్వ‌హిస్తామ‌ని, ఈ ఏడాది బీచ్ ఫెస్టివ‌ల్ త‌ర‌లి వ‌చ్చేందుకు వ‌స‌తి, స‌దుపాయాల క‌ల్ప‌న‌కు ముంద‌స్తుగానే ఆంధ్రాగోవా బీచ్ ఫెస్టివ‌ల్ అనే వెబ్ సైట్ ద్వారా స్లాట్లు తెరుస్తామ‌ని నిర్వాహ‌కులు చెబుతున్నారు.. </p>
<h3>ఆంధ్రాగోవా ఎస్.యానాంకు ఇలా చేరాలి..</h3>
<p>అంబేడ్క‌ర్ కోన‌సీమ జిల్లా కేంద్ర‌మైన అమ‌లాపురం నుంచి ఎస్‌.యానాం బీచ్‌కు చేరుకోవాలంటే 34 కిలోమీట‌ర్లు ప్ర‌యాణం చేయాల్సి ఉంటుంది. అమ‌లాపురం నుంచి బీచ్ వ‌రకు ప‌క్కా రోడ్లు స‌దుపాయాలున్నాయి. బ‌స్సు స‌దుపాయం కూడా ఉంది. ఇక రాజ‌మండ్రి నుంచి వ‌చ్చేవారు రాజ‌మండ్రి రైల్వే స్టేష‌న్ నుంచి అమ‌లాపురం వ‌చ్చి అమ‌లాపురం నుంచి ఎస్‌.యానాం చేరుకోవ‌చ్చు. కాకినాడ నుంచి అమ‌లాపురం వ‌చ్చి అక్క‌డి నుంచి ఎస్‌.యానాం బీచ్‌కు సునాయాసంగా చేరుకోవ‌చ్చు. </p>
1 month ago
2 
