<p>Adilabad Bike Theft | ఆదిలాబాద్; ఉమ్మడి ఆదిలాబాద్ జిల్లా, మహారాష్ట్ర పరిసర ప్రాంతాల్లో వరుస బైక్ దొంగతనాలకు పాల్పడుతున్న అంతర్రాష్ట్ర ముఠా ఆట కట్టించారు పోలీసులు. బుధవారం స్థానిక పోలీస్ హెడ్‌క్వార్టర్స్ లో ఏర్పాటు చేసిన మీడియా సమావేశంలో జిల్లా ఎస్పీ అఖిల్ మహాజన్ కేసు వివరాలను వెల్లడించారు. ఇచ్చోడ పోలీస్ స్టేషన్ పరిధిలో జరుగుతున్న టూవీలర్స్ దొంగతనాలపై ప్రత్యేక దృష్టి సారించిన పోలీసులు, సిసిటీవీ కెమెరాలు, సాంకేతిక ఆధారాలు, లభ్యమైన సమాచారం ఆధారంగా దర్యాప్తు చేపట్టారు.</p>
<p>ఆగస్టు 6న సాయంత్రం 5 గంటలకు సుభాష్ నగర్ కాలనీ, ఇచ్చోడకు చెందిన ధరాడే బాలాజీ, S/o విట్టల్ రావు ఇచ్చోడ పోలీస్ స్టేషన్‌లో ఫిర్యాదు చేశారు. ఆగస్టు 5న రాత్రి తన ఇంటి ఆవరణలో పార్క్ చేసిన తన టూవీలర్‌ను గుర్తుతెలియని వ్యక్తులు దొంగిలించినట్లు ఫిర్యాదులో పేర్కొన్నారు. దీనిపై ఇచ్చోడ పోలీస్ స్టేషన్‌లో కేసు నమోదు చేసి దర్యాప్తు ప్రారంభించారు. ఇచ్చోడ ఎస్‌హెచ్‌ఓ తన సిబ్బందితో కలిసి సాంకేతిక ఆధారాల ద్వారా నిందితులను గుర్తించి అదుపులోకి తీసుకుని విచారించారు. విచారణలో నిందితులు గత కొంతకాలంగా మరికొందరితో కలిసి ముఠాగా ఏర్పడి ఈజీగా డబ్బు సంపాదించాలనే ఉద్దేశంతో ఇచ్చోడ, ఆదిలాబాద్, నిర్మల్, నిజామాబాద్ జిల్లాలతో పాటు మహారాష్ట్ర పరిసర ప్రాంతాల్లో సుమారు 44 ద్విచక్ర వాహనాలను దొంగిలించినట్లు వెల్లడించారు.</p>
<p><br /><img src="https://feeds.abplive.com/onecms/images/uploaded-images/2026/08/12/128639138c2727302b8604dc44a49a1a1786534400687233_original.jpeg" /></p>
<p>దొంగిలించిన వాహనాల నంబర్ ప్లేట్లను మార్చి, ఇతరులకు విక్రయించి లాభం పొందినట్లు విచారణలో వెలుగులోకి వచ్చింది. నిందితుల సమాచారం మేరకు పోలీసులు 44 ద్విచక్ర వాహనాలను స్వాధీనం చేసుకున్నారు.</p>
<p><strong>అరెస్టు అయిన దొంగల వివరాలు </strong></p>
<p>1. మారంపెళ్లి అనిల్ (21), S/o సంజీవ్, చించోళి గ్రామం, ఇచ్చోడ మండలం.<br />2. షేక్ షబ్బీర్ (39), S/o మహమ్మద్, చించోళి గ్రామం.<br />3. షేక్ ముస్తాషాహిద్ (36), S/o షేక్ కరీం, కేశవపట్నం.<br />4. మహమ్మద్ జాకీర్ (55), S/o మహమ్మద్ అనీఫ్, సిరికొండ గ్రామం, మండలం.<br />5. మహమ్మద్ షఫీ (37), S/o అజీజ్, సిరికొండ గ్రామం.</p>
<p>దొంగిలించిన వాహనాలను కొనుగోలు చేసిన గుండాల కేశవపట్నం గ్రామాలకు చెందిన వారు </p>
<p>1. ముజాహిద్, S/o కరీమ్ – కేశవపట్నం.(అరెస్టు)<br />2. ఇక్బాల్, S/o పీర్ మహమ్మద్ – గుండాల. (అరెస్టు)<br />3. కరీం, S/o మహమ్మద్, కేశవపట్నం (అరెస్టు)</p>
<p><br /><img src="https://feeds.abplive.com/onecms/images/uploaded-images/2026/08/12/6a3d42ddfc072cfca64febc0112db17a1786534424021233_original.jpeg" /></p>
<p>వీరిలో 3 మంది దొంగిలించిన వాహనాలను కొనుగోలు చేసినందుకు అరెస్టు చేయగా, మిగిలిన వారిపై కేసులు నమోదు చేసి దర్యాప్తు కొనసాగిస్తున్నారు. ఇంకా సుమారు 20 మంది వాహనాలను కొనుగోలు చేసిన వారి వివరాలను పోలీసులు సేకరిస్తున్నారు. స్వాధీనం చేసుకున్న వాహనాల అసలు యజమానులను గుర్తించే ప్రక్రియ కొనసాగుతోంది అని, గతంలో జరిగిన ఇతర టూవీలర్స్ దొంగతనాలపై కూడా పోలీసులు దర్యాప్తు చేస్తున్నారు.</p>
<p><br /><img src="https://feeds.abplive.com/onecms/images/uploaded-images/2026/08/12/c8ceefb64dd851ab4be74f82f129dd681786534474542233_original.jpeg" /></p>
<p>వాహన యజమానులు తమ బైక్స్ సురక్షిత ప్రదేశాల్లో పార్క్ చేసి తప్పనిసరిగా తాళాలు వేయాలని, వీలైనంత వరకు సీసీటీవీ కెమెరాలు ఉన్న ప్రదేశాల్లోనే వాహనాలను పార్క్ చేయాలని ఎస్పీ సూచించారు. అనుమానాస్పద వ్యక్తులు లేదా కార్యకలాపాలు కనిపిస్తే వెంటనే పోలీసులకు సమాచారం అందించాలని కోరారు. ఇచ్చోడ పోలీసులు సాంకేతిక ఆధారాలతో చాకచక్యంగా దర్యాప్తు చేసి అంతర్రాష్ట్ర బైక్ దొంగతనాల ముఠాను పట్టుకుని 44 టూవీలర్స్ రికవరీ చేసినందుకు అభినందించారు. ఈ కార్యక్రమంలో ఉట్నూర్ ఏఎస్పీ రుత్విక్ సాయి కొట్టే ఐపీఎస్, ఇచ్చోడ ఎస్‌హెచ్‌ఓ కె. నరేష్ కుమార్, సీసీఎస్ ఇన్‌స్పెక్టర్ చంద్రశేఖర్, పోలీసు సిబ్బంది పాల్గొన్నారు.</p>
2 months ago
4 
