<p>Ganesh Immersion | ఆదిలాబాద్ జిల్లా కేంద్రంలో గణేష్ విగ్రహాల నిమజ్జన శోభాయాత్ర సమయంలో తీవ్ర ఉద్రిక్తత చోటుచేసుకుంది. పట్టణంలోని ప్రముఖ అంబేద్కర్ చౌరస్తా వద్ద గణేష్ మండళ్ల నిర్వాహకులు, భక్తులు ఒక్కసారిగా ఆందోళనకు దిగడంతో శోభాయాత్ర తాత్కాలికంగా నిలిచిపోయింది. వినాయక నిమజ్జనం ఊరేగింపులో వాహనాలను త్వరగా ముందుకు తీసుకెళ్లాలని పోలీసులు ఒత్తిడి తెచ్చారని, ఈ బ్యాండ్‌ బృందంపై పోలీసులు దాడి చేశారని ఆరోపిస్తూ నిర్వాహకులు రోడ్డుపై బైఠాయించారు. స్థానిక ఎమ్మెల్యే తనయుడు పాయల్ శరత్‌తో పాటు బిజెపి నాయకులు, హిందూ సంఘాల ప్రతినిధులు, పెద్ద సంఖ్యలో భక్తులు రోడ్డుపైనే కూర్చొని కొంత సమయం భజనలు చేస్తూ నిరసన వ్యక్తం చేశారు. డీజేలు, బ్యాండ్లను యథావిధిగా కొనసాగనివ్వాలని గణేష్ మండపాల నిర్వాహకులు డిమాండ్ చేశారు.</p>
<p><strong>రంగంలోకి దిగిన కలెక్టర్.. భక్తుల ఫిర్యాదులు</strong></p>
<p>సమాచారం అందుకున్న వెంటనే అక్కడికి చేరుకున్న అదనపు కలెక్టర్ రాజేశ్వర్ ఆందోళనకారులతో మాట్లాడి శాంతింపజేసే ప్రయత్నం చేసినా ప్రయోజనం లేకపోయింది. జిల్లా ఎస్పీ స్వయంగా వచ్చి కొబ్బరికాయ కొట్టి శోభాయాత్రను పునఃప్రారంభించే వరకు కదిలేది లేదని నిర్వాహకులు పట్టుబట్టారు. విషయం తెలుసుకున్న ఆదిలాబాద్ జిల్లా కలెక్టర్ రాజర్షి షా, స్థానిక ఎమ్మెల్యే పాయల్ శంకర్ వెంటనే అంబేద్కర్ చౌరస్తాకు చేరుకుని ఆందోళనకారులతో చర్చలు జరిపారు. గత 50- 60 ఏళ్లుగా ఆదిలాబాద్‌లో ప్రశాంత వాతావరణంలో గణేష్ ఉత్సవాలు జరుగుతున్నాయని, ఈ రోజు ఉద్దేశపూర్వకంగా చేసిన అసౌకర్యంపై సమగ్ర విచారణ జరిపించి బాధ్యులపై కఠిన చర్యలు తీసుకుంటామని కలెక్టర్ హామీ ఇచ్చారు.</p>
<p>విచారణ చేపట్టి బాధ్యులపై చర్యలు తీసుకుంటామని కలెక్టర్ హామీ ఇచ్చారు. కలెక్టర్ రాజర్షి షా, ఎమ్మెల్యేల హామీతో సంతృప్తి చెందిన గణేష్ మండళ్ల నిర్వాహకులు తమ ఆందోళనను విరమించారు. దీంతో నిలిచిపోయిన గణేష్ నిమజ్జన శోభాయాత్ర తిరిగి ప్రారంభమై మరింత ప్రశాంత వాతావరణంలో కొనసాగింది. నగరంలోని విగ్రహాలను సమీపంలో ఉన్న పెన్ గంగా నది వద్ద శాస్త్రోక్తంగా నిమజ్జనం చేసేందుకు అన్ని ఏర్పాట్లు పూర్తి చేశారు. గణేష్ నిమజ్జన శోభాయాత్ర అక్కడి వరకు చేరుకున్నాక బొజ్జ గణపయ్య విగ్రహాలను సిబ్బంది నిమజ్జనం చేస్తున్నారు.</p>
<p>Also Read: <a href="https://telugu.abplive.com/politics/by-elections-in-khairatabad-and-huzurabad-telangana-assembly-privilege-committee-padi-kaushik-reddy-259947" target="_blank" rel="noopener">khairatabad: ఖైరతాబాద్‌తో పాటు హుజూరాబాద్‌కూ ఉపఎన్నిక? - పాడి కౌశిక్ రెడ్డి లక్ష్యంగా కాంగ్రెస్ బిగ్ ప్లాన్!</a><br /><br /></p>
1 month ago
2 
