<p><strong>Abhishek Reclaims Top Spot:</strong> న్యూజిలాండ్‌తో వెల్లింగ్టన్ వేదికగా జరిగిన మూడో టీ20 మ్యాచ్‌లో ఆకాశమే హద్దుగా చెలరేగిన భారత డాషింగ్ ఓపెనర్ అభిషేక్ శర్మ ఐసీసీ పురుషుల టీ20 ర్యాంకింగ్స్‌లో మళ్లీ సింహాసనాన్ని అధిష్టించాడు. మంగళవారం జరిగిన పోరులో కేవలం 38 బంతుల్లోనే 113 పరుగులతో నాల్గో అంతర్జాతీయ శతకం బాది భారత్ ఘనవిజయంలో కీలక పాత్ర పోషించాడు. ఈ అద్భుత ఇన్నింగ్స్ దెబ్బకు ఇప్పటివరకు అగ్రస్థానంలో ఉన్న భారత వికెట్ కీపర్ బ్యాటర్ ఇషాన్ కిషన్‌ను వెనక్కి నెట్టి అభిషేక్ తిరిగి వరల్డ్ నంబర్ వన్ స్థానాన్ని సొంతం చేసుకున్నాడు. గాయం కారణంగా గత రెండు మ్యాచ్‌లకు దూరమైన ఇషాన్ కిషన్ ఏకంగా మూడో స్థానానికి పడిపోయాడు. ప్రస్తుతం పాకిస్థాన్ కెప్టెన్ సాహిబ్‌జాదా ఫర్హాన్ 883 పాయింట్లతో రెండో స్థానాన్ని ఆక్రమించగా, అభిషేక్ శర్మ 897 రేటింగ్ పాయింట్లతో టాప్‌లో నిలిచాడు. ఇషాన్ కిషన్ 866 పాయింట్లతో మూడో స్థానంలో ఉన్నాడు. మరోవైపు టీమిండియా టీ20 కెప్టెన్ శ్రేయస్ అయ్యర్ ఐదు స్థానాలు దిగజారి 758 పాయింట్లతో తొమ్మిదో ర్యాంకుకు పడిపోయాడు. జులైలో ఐర్లాండ్ టూర్‌లో రాణించి అభిషేక్ నుంచి నంబర్ వన్ ర్యాంకును లాక్కున్న ఇషాన్, ఇప్పుడు గాయంతో మళ్లీ ఆ స్థానాన్ని కోల్పోవాల్సి వచ్చింది.</p>
<blockquote class="twitter-tweet">
<p dir="ltr" lang="en">𝗧𝗵𝗲 𝗡𝗲𝘄 𝗪𝗼𝗿𝗹𝗱 𝗡𝗼.𝟭 🫡 Congratulations to Abhishek Sharma on reclaiming the top spot in the ICC Men's T20I Batting Rankings 👏👏 #TeamIndia | @OfficialAbhi04 https://t.co/tjtDSTAEp0</p>
— BCCI (@BCCI) <a href="https://x.com/BCCI/status/2115452243042599372?ref_src=twsrc%5Etfw">October 28, 2026</a></blockquote>
<p>
<script src="https://platform.x.com/widgets.js" async="" charset="utf-8"></script>
</p>
<p> </p>
<p><strong>జడేజా ఆధిపత్యానికి తెర: మార్కో జాన్సెన్ డబుల్ ధమాకా</strong><br />టెస్ట్ క్రికెట్ ర్యాంకింగ్స్‌లో దక్షిణాఫ్రికా స్టార్ ఆల్‌రౌండర్ మార్కో జాన్సెన్ సరికొత్త చరిత్ర సృష్టించాడు. ఆస్ట్రేలియాతో జరిగిన రెండో వరల్డ్ టెస్ట్ ఛాంపియన్‌షిప్ మ్యాచ్‌లో 85 పరుగులతో పాటు ఐదు వికెట్లు తీసి అదరగొట్టాడు. ఈ అసాధారణ ప్రదర్శనతో నాలుగేళ్లుగా రవీంద్ర జడేజా చేతుల్లో ఉన్న టెస్ట్ నంబర్ వన్ ఆల్‌రౌండర్ కిరీటాన్ని జాన్సెన్ ఎగరేసుకుపోయాడు. అంతేకాకుండా ఆస్ట్రేలియా పేసర్ మిచెల్ స్టార్క్‌ను వెనక్కి నెట్టి ప్రపంచ నంబర్ వన్ టెస్ట్ బౌలర్‌గానూ నిలిచాడు. కెరీర్‌లో తొలిసారి ఒకేసారి రెండు విభాగాల్లో అగ్రస్థానం సాధించి రికార్డు నెలకొల్పాడు. బ్యాటర్ల జాబితాలోనూ 13 స్థానాలు ఎగబాకి 56వ ర్యాంకుకు చేరాడు.</p>
<p>Read Also: <a title="Arshdeep World Record: జోష్ లిటిల్ నంబర్లను సమం చేస్తూ సరికొత్త మైలురాయి.. వెల్లింగ్టన్ లో భారత పేసర్ అర్ష్‌దీప్ సింగ్ ప్రపంచ రికార్డు" href="https://telugu.abplive.com/sports/cricket/arshdeep-singh-equals-world-record-for-most-calendar-year-t20i-wickets-by-full-member-nation-262516" target="_self">Arshdeep World Record: జోష్ లిటిల్ నంబర్లను సమం చేస్తూ సరికొత్త మైలురాయి.. వెల్లింగ్టన్ లో భారత పేసర్ అర్ష్‌దీప్ సింగ్ ప్రపంచ రికార్డు</a></p>
<p><strong>బుమ్రాకు షాక్: ఐదో స్థానానికి పడిపోయిన పేస్ గన్</strong><br />తాజా టెస్ట్ బౌలర్ల ర్యాంకింగ్స్‌లో భారత స్టార్ పేసర్ జస్‌ప్రీత్ బుమ్రా ఒక స్థానం దిగజారి 853 పాయింట్లతో ఐదో ర్యాంకుకు పరిమితమయ్యాడు. రెడ్ బాల్ క్రికెట్ ఆడకపోవడంతో బుమ్రా ర్యాంకింగ్‌పై ప్రభావం పడింది.</p>
<p><strong>మహిళల వన్డేల్లో వోల్వార్డ్ హవా: రెండో స్థానంలో మంధాన</strong><br />మహిళల క్రికెట్ విభాగంలోనూ మార్పులు చోటుచేసుకున్నాయి. వన్డే బ్యాటింగ్ ర్యాంకింగ్స్‌లో భారత స్టార్ ఓపెనర్ స్మృతి మంధానను వెనక్కి నెట్టి దక్షిణాఫ్రికా కెప్టెన్ లారా వోల్వార్డ్ ప్రపంచ నంబర్ వన్ ర్యాంకును కైవసం చేసుకుంది. ప్రస్తుతం వన్డేల్లో రెండో స్థానానికి పరిమితమైన మంధాన, టీ20 ర్యాంకింగ్స్‌లో షఫాలీ వర్మ తర్వాతి స్థానంలో నిలిచి నాలుగో ర్యాంకులో కొనసాగుతోంది. </p>
2 days ago
2 
