<p><strong>Yamaha EC 06 Electric Scooter Range, Features, Price:</strong> యమహా ఎట్టకేలకు భారత ఎలక్ట్రిక్‌ స్కూటర్‌ మార్కెట్‌లోకి బలంగా అడుగు పెట్టింది. కొత్తగా ఆవిష్కరించిన Yamaha EC-06 ఎలక్ట్రిక్‌ స్కూటర్‌ ఒక్క ఫుల్‌ చార్జ్‌తో 160 కి.మీ. వరకు ప్రయాణించగలదని కంపెనీ ప్రకటించింది. అద్భుతమైన డిజైన్‌, ఆధునిక టెక్నాలజీ, & స్మార్ట్‌ ఫీచర్లతో ఈ స్కూటర్‌ ప్రస్తుతం బజ్‌ క్రియేట్‌ చేస్తోంది.</p>
<p><strong>పవర్‌ఫుల్‌ మోటార్‌ - మైలేజ్‌లో మాస్‌</strong><br />Yamaha EC-06 ఎలక్ట్రిక్‌ స్కూటర్‌లో 4.5 కిలోవాట్‌ ఎలక్ట్రిక్‌ మోటార్‌ అమర్చారు, ఇది గరిష్టంగా 8.98 Hp పవర్‌ ఇస్తుంది. దీని 4 కిలోవాట్‌ గంటల లిథియం-అయాన్‌ బ్యాటరీ రోజువారీ ప్రయాణాలకు సరిపోయే స్థిరమైన రేంజ్‌ ఇస్తుంది. కంపెనీ ప్రకారం, EC-06 ని ఫుల్‌గా చార్జ్‌ చేస్తే 160 కి.మీ. (Yamaha EC 06 Electric Scooter Range) హాయిగా నడుపుకోవచ్చు.</p>
<p><strong>చార్జింగ్‌ & రైడింగ్‌ మోడ్స్‌</strong><br />Yamaha EC-06 ఎలక్ట్రిక్‌ స్కూటర్‌లో హోమ్‌ చార్జింగ్‌ సపోర్ట్‌ ఉంది. అంటే, ఇంట్లోనే సాధారణ ప్లగ్‌ ఈజీగా ఛార్జ్‌ చేసుకోవచ్చు. సుమారు 9 గంటల్లో ఫుల్‌ చార్జ్‌ అవుతుంది. ఈ ఈ-స్కూటర్‌లో, రైడర్‌ అవసరాలకు అనుగుణంగా మూడు రైడింగ్‌ మోడ్స్‌ ఇచ్చారు. అలాగే, పార్కింగ్‌ సమయంలో సహాయపడే రివర్స్‌ మోడ్‌ కూడా ఉంది, ముఖ్యంగా పెద్దవాళ్లు & మహిళలకు ఈ ఫీచర్‌ చాలా ఉపయోగపడుతుంది. బండిని వెనక్కు తీసుకువెళ్లాలనుకున్నప్పుడు రైడర్‌ కిందకు దిగాల్సిన అవసరం లేదు, రివర్స్‌ మోడ్‌లో పెట్టి స్లోగా రైజ్‌ ఇస్తే చాలు.</p>
<p><strong>స్మార్ట్‌ కనెక్టివిటీ & ఫీచర్లు</strong><br />ఈ స్కూటర్‌లో ఉన్న సిమ్‌-బేస్డ్‌ కనెక్టివిటీ, ఇన్‌బిల్ట్‌ టెలీమాటిక్స్‌ యూనిట్‌ ద్వారా రియల్‌ టైమ్‌ డేటా యాక్సెస్‌, లోకేషన్‌ ట్రాకింగ్‌ వంటి సదుపాయాలు లభిస్తాయి. భవిష్యత్తులో రైడ్‌ అనలిటిక్స్‌, సర్వీస్‌ రిమైండర్లు కూడా అందించే అవకాశం ఉంది. అంటే, అడ్వాన్స్‌డ్‌ ఫీచర్ల పరంగా టాప్‌లో ఉంది.</p>
<p><strong>లుక్స్‌ & సేఫ్టీ</strong><br />Yamaha EC-06 ఎలక్ట్రిక్‌ స్కూటర్‌ డిజైన్‌ క్లాసీగా ఉంది. LED హెడ్‌ల్యాంప్స్‌, టెయిల్‌ల్యాంప్స్‌, ఇండికేటర్లు అందంగా మెరుస్తున్నాయి. రైడర్‌ సేఫ్టీ కోసం ముందు & వెనుక డిస్క్‌ బ్రేకులు ఇచ్చారు. 24.5 లీటర్ల స్టోరేజ్‌ స్పేస్‌ కూడా ఉంది, సరుకులను ఈజీగా ఇంటికి తీసుకువెళ్లవచ్చు. ఇవన్నీ, EC-06 ని రోజువారీ వినియోగానికి సరైన ఆప్షన్‌గా నిలబెడతాయి.</p>
<p><strong>ధర & డెలివెరీ టైమ్‌లైన్‌</strong><br />యమహా ఈ స్కూటర్‌ను ప్రత్యేకంగా భారత మార్కెట్‌ కోసమే రూపొదించింది. యమహా ఇప్పుడు నిర్వహించిన ఈవెంట్‌ ఆవిష్కరణ (స్కూటర్‌ పరిచయం) మాత్రమే. ఈ బండి డెలివరీలు వచ్చే ఏడాది తొలి త్రైమాసికంలో ప్రారంభం కానున్నాయి. ధర వివరాలు కూడా అదే సమయంలో వెల్లడిస్తారు.</p>
<p>యమహా ఇప్పటి వరకు ఎలక్ట్రిక్‌ సెగ్మెంట్‌లో వెనుకబడి ఉన్నప్పటికీ, EC-06 & Aerox-E తో ఇప్పుడు గేమ్‌ మార్చబోతోందని చెప్పవచ్చు. ఈ EC-06 స్కూటర్‌ స్మార్ట్‌ డిజైన్‌, శక్తిమంతమైన మోటార్‌, & భారీ రేంజ్‌తో యూత్‌ హార్ట్‌లో సీటు దక్కించుకోవడం ఖాయంగా కనిపిస్తోంది.</p>
<p><em><strong>ఇంకా ఇలాంటి ఆటోమొబైల్‌ వార్తలు & అప్‌డేట్స్‌ - "ABP దేశం" 'ఆటో' సెక్షన్‌ని ఫాలో అవ్వండి.</strong></em></p>
3 weeks ago
2 
